- A falta de fortuna de cara á meta rival do Viaxes Amarelle FSF nesta 18ª xornada da Primera División do FutSalFem da RFEF condena ás galegas a un resultado de gafas (0-0) no seu cruce na Coruña ante o Gran Canaria FSF Teldeportivo
Facíalle falta gañara ao equipo herculino do Viaxes Amarelle FSF pero a falta de gol impediullo ao equipo que prepara Jorge Basanta. En fronte estaba un rival directo na lea pola permanencia na máxima categoría do fútbol sala feminino español, o Gran Canaria FSF Teldeportivo.
As herculinas do Viaxes Amarelle FSF ían a por todas desde o primeiro segundo de partido, cunha clara actitude ofensiva e xerando moito perigo sobre a portería visitante, pero a falta de fortuna ante a porta rival, non fixo posible que as galegas anotaran. A porteira visitante chegou incluso a parar un penalti e un dobre penalti. Reparto de puntos entre coruñesas e grancanarias tras escoitarse a bucina do final do partido.
O cruce empezaba cun cadro galego que traballara moito este partido e empezaba querendo ter o balón e encerrando ao rival sobre a súa propia portería, cunha presión moi alta na saída de balón. Este plantexamento de choque obrigaba ás visitantes a ter que saír en moitas ocasións con balóns longos.
O bo facer das herculinas facía que chegasen as primeiras ocasións para elas, pero unha gran actuación de Mariona, baixo paus no cuadro canario, impedía que chegase o gol ao luminoso da Sagrada Familia. Os minutos pasaban, e o partido centrábase sobre a cancha visitante, e na medianía do período, realizan un penalti sobre Cláudia Lobo. Cris Lourés executa o disparo, pero Mariona acertaba nas intencións e conseguía blocar o balón, e impedir que as herculinas se puxesen por diante no marcador.
As futbolistas do Gran Canaria FSF Teldeportivo cargáronse pronto de faltas, e chegaron na medianía do primeiro tempo á quinta falta. As coruñesas continuaban co seu xogo e buscando a portería grancanaria, pero a fortuna seguía sen aliarse con elas.
A falta de pouco máis de cinco minutos para o descanso chegaba a sexta falta visitante, e Cláudia Lobo executaba un bo disparo desde os dez metros. Novamente Mariona acertaba e bota o balón a córner.
As visitantes apenas conseguían xerar perigo na saída de balón, nin chegar con claridade sobre a portería de Leti Rojo, e o partido chegaba ao descanso co marcador inicial.
Logo do paso por vestiarios, o conxunto grancanario saía cunha mellor circulación de balón, e as herculinas a pesar de que seguían xerando perigo sobre a portería contraria, non terminaban de atopar a mesma soltura que na primeira metade. En ocasións precipitábanse demasiado nas accións de ataque.
A pesar de que as visitantes gañaban protagonismo en xogo, non terminaban de xerar perigo sobre a portería de Leti Rojo, e as accións defensivas das galegas evitaban que as ocasións visitantes fosen o suficientemente claras.
Os minutos pasaban, e as xogadoras galegas do Viaxes Amarelle FSF sabían que precisaban atopar o camiño do gol e asinar a súa primeira vitoria do ano na casa. Seguiron a loitar polo triunfo e chegaron varias ocasións moi claras nos últimos minutos, pero o gol seguía faltando.
Mesmo nos dous últimos minutos de partido Jorge Basanta optou por arriscar co xogo de cinco para poder conseguir o ansiado gol, pero nin por esas. O Viaxes Amarelle FSF non foi quen de finalizar ningunha das ocasións sobre a portería visitante, e o partido chegaba ao seu final co 0-0 inicial.
Co reparto de puntos entre ambas as dúas escuadras as herculinas manteñen a distancia de cinco puntos cos postos de descenso.
Semana con varios partidos para o Viaxes Amarelle
Logo deste novo duelo oficial da tempada, o conxunto coruñés descansa o domingo e o luns retoma os adestramentos, para preparar a semana próxima. O Viaxes Amarelle FSF ten por diante ata tres encontros, pola disputa en metade de semana do encontro de semifinais de Copa Xunta, aínda que a primeira parada será visitando ao segundo clasificado.
A Primeira RFEF Futsal Feminina afronta a decimonovena xornada da competición, en partido que terá lugar o sábado 18 de febreiro de 2023, a partir das 19:00 horas no Pavillón Municipal Príncipe Felipe (Pontevedra). O Viaxes Amarelle FSF visitará ao Poio Pescamar FSF. Duelo de rivalidade galega entre dous equipos que ocupan postos moi dispares na táboa neste momento da competición.
FICHA TÉCNICA
0) VIAXES AMARELLE FSF: Leti Rojo, Carol Agulla, Lau Doce, Tety e Clàudia Lobo – quinteto inicial -. Tamén xogaron: Èlia Gullí, Cris Lourés, Marta Hermo e Laura Rivas.
0) GRAN CANARIA FSF TELDEPORTIVO: Mariona, Anita Ontiveros, Sofía, Idoya e Martita – quinteto inicial -. Tamén xogaron: Play, Collado, Virginia e Pina.
GOLES: Sen goles.
EQUIPO ARBITRAL: José Manuel Carreira Romero e Iria de Luis Iglesia del Comité Técnico de Árbitros de A Coruña y A Mariña. Arbitro Asistente: Héctor Pérez Álvarez del Comité Técnico de Árbitros de A Coruña. Mesa: Santiago Modroño Liz del Comité Técnico de Árbitros de A Coruña. Amonestaron con cartón amarelo a Tety, Carol Agulla e Clàudia Lobo nas filas do conxunto do Viaxes Amarelle FSF, e na escuadra grancanaria amonestaron con cartón amarelo a Javier.
INCIDENCIAS: Partido correspondente á 18ª xornada da Primera División do FutSalFem da RFEF disputado no pavillón municipal da Sagrada Familia, na Coruña.
