Este domingo, 10 de xaneiro, faleceu Guillermo Sande, seleccionador e responsable técnico da Federación Galega de Ciclismo no Hospital de Valdecilla de Santander.
O adestrador sufriu un infarto o sábado, mentres se atopaba coa Selección Galega no Campionato de España de Ciclocrós de Torrelavega, aos 55 anos de idade.
En palabras da propia Federación, a morte de Sande “provoca un baleiro no ciclismo galego que non se pode expresar con palabras. Levaba preto de 25 anos formando parte do equipo da FGC. Encargábase do seguemento dos corredores, do deseño das carreiras, da coordinación das competicións… E todas as súas responsabilidades sempre as levou a cabo coa máxima humildade, educación e profesionalidade”.
A organización de ciclismo trasmite o pésame a familiares e amigos de Guillermo Sande, e informa de que este martes o seu corpo será incinerado no tanatorio Vigo Memorial. Antes haberá unha misa ás 17:45 horas.
