O recinto cuberto de Expourense acollerá o XXXII Campionato de España máster de pista cuberta os días 26, 27 e 28 deste mes de novembro, ao mellor atletismo estatal que se dará cita así na capital ourensá. Entre os equipos galegos que teñen confirmado a súa participación en categoría feminina están o Atlética Silva, Club Atletismo Sada, Riazor Coruña, Lucus Caixa Rural Galega, Burgas Ourense, CD La Purísima, Ourense Atletismo, ADAS Proinor, Sociedad Gimnástica Pontevedra, Atletismo Cuntis, At. Rias Baixas, At. Femenino Celta, Atletismo Samertolameu e Sociedade Atletica do Trega.
Tamén Expourense foi o escenario da presentación da competición que tiña lugar hoxe luns 22 de novembro. No acto participou o secretario xeral para o Deporte, José Ramón Lete Lasa. Na súa intervención destacou o evento como o “broche de ouro” para un 2021 no que a Federación Galega de Atletismo cumpre cen anos e no que o atletismo galego acadou en Toquio a súa primeira medalla olímpica, o bronce en triplo salto de Ana Peleteiro.
Isidoro Hornillos, presidente da Federación Galega de Atletismo, destacaba pola súa banda a gran capacidade loxística e organizativa do atletismo galego e concretamente o ourensá, que fixo posible a celebración de tres importantes campionatos de España ata o momento. Na mesma línea dirixíase o vicepresidente segundo da Deputación de Ourense, Rosendo Fernández, quen salientaba a gran calidade da instalación atlética cuberta.
Outro dos comparecentes, o concellal de Deportes de Ourense Mario Guede que actuaba en calidade de anfitrión, daba as gracias ás distintas institucións presentes por elexir a súa cidade como sede deste campionato, lembrando de igual modo, a enorme importancia que se lle outorga desde o Concello de Ourense ao deporte.
O secretario xeral para o Deporte da Xunta de Galicia José Ramón Lete Lasa citaba ós dez récords do mundo do atleta galego máster Pepín Rioseco, para poñer en valor e exemplo o que este tipo de acontecementos e éxitos teñen na sociedade a nivel xeral.
A celebración do Máster de Atletismo en Ourense é “garantía de éxito”, di Lete Lasa
Por outra banda, ademais da elite e da base, salientaba Lete Lasa a “actividade competitiva daqueles deportistas que xa non están na súa plenitude física, pero que seguen sendo exemplo e modelo a seguir para os máis mozos por representar valores tan importantes como constancia, traballo ou superación”. Neste sentido, José Ramón Lete Lasa sinalou que a celebración do Máster de Atletismo en Ourense é “unha garantía de éxito”.
Por unha banda, destacou a calidade dos atletas galegos que no Campionato de España Máster en Pista Cuberta de 2020 acadaron 17 medallas de ouro e no Campionato ao Aire Libre de 2021, 11. Pola outra, resaltou a calidade da pista de Expourense como “a mellor de España” na que a Xunta xa investiu un total de 4,3 millóns de euros e da que se vén de autorizar a segunda addenda do convenio para o seu mantemento, conservación e funcionamento para 2022 por 100.000 euros.
Por todo isto, a pista xa acolleu catro campionatos de España en catro anos de vida da pista: o sub 20 en 2018, o Máster de 2019, o Absoluto de 2020 e agora, de novo, o Máster de 2021, ademais dunha trintena de campionatos galegos de distintas categorías.
O secretario xeral destacou tamén a aposta decidida da Xunta de Galicia polas instalacións ourensás engadindo a remodelación do Estadio do Couto (2,6 millóns de euros), a reforma integral do Pavillón dos Remedios (2 millóns de euros) e a renovación do complexo deportivo de Monterrei (10 millóns de euros cofinanciados ao 50% coa Deputación de Ourense); así como a aposta polas instalacións de atletismo entre a que destacou o módulo cuberto do IFEVI en Vigo, cuxa construción será licitada nos vindeiros días.
Toda a info do XXXII Campionato de España Máster en pista cuberta, aquí
- Atletas inscritos.
- Probas.
- Clubs.
