A Real Federación Española de Piragüismo (RFEP) está celebrando as probas do Selectivo Nacional Trials Olímpicos no CTD Trasona. Na xornada do mércores houbo boas novas para padexeiras galegas como Teresa Portela, Antía Jácome ou Antía Otero. Desta cita sairán as embarcacións que loitarán por estar nos Xogos Olímpicos de París 2024.
As condicións climatolóxicas non acompañaron no primeiro día de competición deste Selectivo Nacional Trials Olímpicos , obrigando a atrasar o horario previsto das finais do K4 500 e do C2 500, segundo explica a RFEP.
O K4 formado por Saúl Craviotto, Carlos Arévalo, Marcus Cooper e Rodrigo Germade cumpriu co obxectivo conseguindo o mellor tempo da súa serie. Os campións do mundo pararon o reloxo en 1:25,301, avantaxando en pouco máis de dous segundos á embarcación formada por Xoel García, Iván Fernández, Aitor Gorrotxategui e Carlos García. As dúas tripulacións conseguen así a clasificación para a Copa do Mundo de Hungría.
En categoría feminina, o K4 de Sara Ouzande, Carolina García, Estefanía Fernández e Teresa Portela cumpriron coas expectativas para conseguir a primeira praza cun tempo de 1:38,086. Á aventura internacional acompañaralles o K4 de Bárbara Pardo, Begoña Lazkano, Laia Pelachs e Miriam Vega.
As canoas tiveron que afrontar un día complicado no Selectivo Nacional Trials Olímpicos debido á os fortes refachos de vento que poñían en dificultade o desenvolvemento normal da proba. A pesar diso, Tano e Pablo (1:45,983), en categoría masculina, xunto con Antía Jácome e María Corbera (2:08,577), en categoría feminina, non titubearon e obtiveron o mellor tempo clasificatorio demostrando que son o C2 máis rápido de España.
Manuel Fontán e Pablo Graña conseguiron a clasificación internacional grazas ao seu segundo posto, do mesmo xeito que María dels Angels Moreno e Antía Otero no C2 Feminino.
Hoxe, xoves 13 de abril, será a quenda das finais do K2 500, así como as clasificatorias do K1 500, do K1 1000, do C1 500 e do C1 1000. Todas as probas poderán seguirse en directo en RTVE Play e RFEP TV.
