Fin de semana de éxitos para os equipos galegos que competiron na Primera División Femenina de voleibol. Nesta xornada, tanto o CV Bruxas como o Aceites Abril CVO lograron sumar os tres puntos ao seu marcador persoal fronte ao CD Voleibol Astillero.
O equipo de Bertamiráns xogou a cita aprazada da quinta xornada mentres que o ourensán enfrontouse ao Astillero no partido correspondente á sétima xornada da competición.
O Calasancias Coruña non xogou e volverá á competición o próximo sábado, 28 de novembro, visitando ao Universidad de Salamanca.
Os conxuntos galegos seguen na parte alta da clasificación
O Bruxas recibía ao CD Voleibol Astillero en casa na tarde do sábado. Na previa do encontro prevíase que o partido decantaríase do lado local, e así foi. O Bruxas chegaba en mellor posición, con dous partidos gañados de tres puntos e só un perdido, mentres que o Astillero contaba con catro puntos ao perder tres partidos (un dun punto) e gañar un de tres puntos.
O encontro comezou moi disputado, cun primeiro set para o combinado galego pero un segundo para o equipo visitante. O terceiro tamén decantouse do lado local, cun 25-19 no marcador, pero foi necesario un cuarto set para decidir o partido. Finalmente, o equipo amaense sumou os tres puntos cun global 3-1, que o sitúa na cuarta posición con nove puntos en catro partidos xogados.
Ao día seguinte, o Astillero desplazábase a Ourense para xogar contra o Aceites Abril, onde colleitou outra derrota. O conxunto galego ven de facer unha moi boa tempada que o sitúa nunha segunda posición que defendeu neste encontro.
Aínda que os primeiros minutos do partido estiveron igualados, a partir do punto 15 o Aceites Abril comezaba a incomodar ao rival coa precisión do seu saque. Así lograron unha vantaxe que lles outorgou o primeiro set cun 25-21.
O resto do partido seguiu na mesma liña. O pulso mantíñase entre ambos conxuntos, pero lixeiramente a favor das locais. No segundo set, as visitantes conseguiron poñer en apuros á recepción das ourensás. Porén, as de Pablo Pérez reaccionaron e resolveron a situación nun momento clave do partido, cunha remontada que deixou o marcador nun 25-23.
Finalmente, as boas rachas no saque de Aceites Abril grazas a Gladys, Johanna, Rebeca e Patri remataron por sentenciar o partido e que os tres puntos quedasen en Ourense.
Para a oitava xornada o Aceites Abril desplazarase a Asturias para xogar contra o Fertiberia Los Campos o 29 de novembro ás 13:00 horas. Pola súa banda, o CV Bruxas queda en Bertamiráns para disputar o encontro contra outro asturiano, o CV Oviedo, o 28 de novembro ás 19:30 horas.