O V Campionato de España Alevín-Promoción foi un éxito para a Federación Galega de Natación (FEGAN), con tres nadadoras de artística en figuras subindo ao podio. Carmen Fuertes, do Sporting Casino, Alejandra Baliña e Carmen Reboredo, ambas do Club Sincro Ourense, volveron a casa con medalla.
A competición, disputada en Inca (Mallorca), celebrouse durante a fin de semana, e deixou a Carmen Fuertes, do Sporting Club Casino da Coruña, como segunda clasificada. O seu club destacou esta “recompensa súper merecida pola túa traxectoria, por ser un exemplo de deportista, de ganas, de esforzo e de ilusión. Porque estamos para soñar e gústanos soñar ao grande”.
Ver esta publicación en Instagram
Pola súa banda, Alejandra Baliña, do Club Sincro Ourense, resultou terceira clasificada, así como a súa compañeira de equipo Carmen Reboredo, na categoría do ano 2010. No equipo ourensán tamén quixeron subliñar este recoñecemento como unha “recompensa a un ano de moito esforzo”.
Catro clubs da FEGAN acudiron ao campionato
Segundo informa a FEGAN, en dúo, Alejandra Baliñas e Carmen Reboredo foron cuartas e Paula Alonso e Candela Pazo do RCN Vigo acadaron o sétimo posto. Na rutina de Equipos o Sincro Ourense foi quinto e o RCN Vigo oitavo, e en Combo o Sincro Ourense sexto e o RCN Vigo, oitavo.
Na clasificación final por clubes de 28 participantes, o Sincro Ourense foi quinto, o RCN Vigo sexto, o Galaico Sincro acadou o posto 14 e o Sporting Casino o posto 21.
