As pistas madrileñas do Gallur acolleron a pasada fin de semana o Campionato de España absoluto de pista cuberta con participación galega. En categoría feminina competiron as atletas Ana Peleteiro, Belén Toimil, Nediam Vargas e Uxía Pérez.
Esta última deportista foi unha incorporación de última hora ao torneo de atletismo. Pérez, do Playas Castellón, foi repescada para competir nos 3.000 metros e este torneo foi o seu debut nun nacional de pista cuberta absoluto. A fondista galega rematou con 10:02.00 no oitavo lugar na segunda semifinal dos 3.000 m. celebrada no día de onte.
Uxía Pérez non competía desde hai seis meses nun campionato de ateltismo e recorda no seu perfil de Instagram o duro deste ano coas complicacións derivadas da COVID-19. A isto se engade a súa lesión en outubro, que a mantivo alonxada das pistas ata decembro.
Uxía Pérez: “Podería estar frustrada pero nesta etapa tan confusa e incerta na que vivimos, quédome coa alegría e ilusión”
“Remato a miña breve experiencia na pista cuberta cunha participación moi discreta e sen dúbida mellorable. Podería estar frustrada pero nesta etapa tan confusa e incerta na que vivimos, quédome coa alegría e ilusión que me aportou esta fin de semana exprés en Madrid”, declara a atleta.
Ver esta publicación en Instagram
Pola súa parte, a venezolana Nediam Nori Vargas competiu durante o venres na proba de combinadas, rematando cunha excleente sexta posición na proba de Pentathlon con 3.889 puntos. Ademais, estableceu unha MMP de lonxitude con 6.04 m. (8.81/1.57/11.44/6.04/2:25.34), segundo informa a Federación de Atletismo Galego.
Ana Peleteiro foi outra das galegas desta competición. A atleta logrou o título nacional de triplo salto, establecendo a súa MMT.
E tampouco faltou Belén Toimil. A de Mugardos acadou tamén o título nacional domiñando sen reparos no seu concurso.
Representando tamén ao atletismo galego, pero na categoría masculina competion Jean Marie Okutu, que logrou un bronce en salto de lonxitude, Adri Ben, que chegou á final dos 800m. pero sen acadar o título, e Alex Barreiro, que volveu a asinar unha MMP.
