O atletismo galego Sub-16 reuniuse a pasada fin de semana no recinto de Expourense, onde se celebrou o Campionato de Galicia de pista cuberta Sub16, á vez dunha xornada de control indoor para as categorías sub10, sub12 e sub14.
En liñas xerais, a competición deixou moi bos resultados para as atletas galegas, xa que varias delas entraron nos postos altos dos ránkings nacionais e tamén se conseguiu un récord galego.
Antía Pernas e Alicia Barreiro, no top nacional sub16
No sector de velocidade deste campionato Sub-16, resultou moi salientable a participación de Antía Pernas do Lucus Caixa Rural Galega que lograba baixar dos oito segundos nas semifinais dos 60 m. marcando un crono de 7.92 que a colocan na cuarta posición do ranking nacional do ano. Na final volvería baixar dos sete segundos con 7.96.
Formidable nivel o presenciado nos 300 m. a carreira feminina onde unha Alicia Barreiro do Ría Ferrol quíxose sumar á festa marcando uns moi salientables 41.89 que a sitúan no top10 do ranking nacional do ano.
Nova campioa en valos e disputada proba en altura
Nos valos a nova campioa galega Ágata Rodríguez do Vila de Cangas lograba baixar dos dez segundos por dúas centésimas, proclamándose campioa da proba.
Na altura, a competición estivo máis emocionante, co duelo entre Aldara Basteiro do ADAS Proinor e Martina Gutiérrez do A.F. Celta. Os igualados resultados remataron por darlle o trunfo cun 1.48 á barquense por apenas dous centímetros.
Récord galego de Lisa Vosberg en pértega
Na categoría de pértega, Lisa Vosberg do AVA deixábanos outra das grandes actuacións do campionato xa que co seu concurso de 3.35 m. lograba un novo récord galego Sub-16.
Esta distancia a sitúa como líder no ranking nacional, mellorando a anterior marca que ela mesma tiña e confirmando así a excelente traxectoria desta saltadora adestrada por Antonio Fernández.
Lonxitude e triplo
Na categoría feminina Sub-16 de lonxitude e triplo, Valeria González do A.F. Celta quedaba as portas dos cinco metros con 4.94 m. na lonxitude, estando o concurso de triplo acaparado tanto por Eva Fernández do Barbanza con 10.44 m. como por Priscila Sánchez do Universidade de Santiago con 10.29 m. ambas por encima dos dez metros
Gema Dacosta, terceira mellor lanzadora de peso en España
Na proba de lanzamento de peso, unha formidable Gema Dacosta do Vila de Cangas facía todos os seus lanzamentos por encima dos once metros, marchando no quinto ata os 11.77 m. que a sitúan como terceira atleta Sub-16 no ranking nacional.
