A atleta galega Eva Queimaño, que milita no Super Amara BT, acadou a medalla de bronce na modalidade atlética de pentatlón dentro do XXXV Campionato de España Sub23 de atletismo en pista cuberta. Galicia obtiña dúas medallas e catro postos de finalistas sumando participacións femininas e masculinas. Ese foi o balance da participación galega nos estatais Sub23 que aconteceron esta fin de semana no Palau velódromo Luis Puig de Valencia.
Eva Queimaño do Super Amara BT e Alex Barrerio do Lugo Runing, convertíronse, polas súas medallas, nos grandes protagonistas galegos da edición nacional de pista cuberta.
“Sen dúbida hai medallas que pola súa importancia e polas súas dificultades disfrútanse de maneira moi especial. O ano que estamos tendo a nivel de oportunidades tanto de competir como de adestrar está facendo que existan importantes e notorias diferencias según en que comunidade nos atopemos. Si a este sumamos carencias importantes de medios e infraestructuras en moitos casos para poder adestrar, debe dar unha idea do gran valor que supón este campíonato para os nosos atletas”, argumentan desde a Federación Galega de Atletismo.
A internacional Eva Queimaño e campioa de España de Aire Libre de heptathlon, novamente subiría ao podio nun ano para ela moi complicado, neste caso na modalidade de pentatlón. A súa actuación de 9.20-1,63-9,99-5,24-2:31.75 daríalle un total de 3.466 puntos cos cales subir ao caixón de honra no terceiro lugar.
No resto de actuacións, Andrea Pais do A.F. Celta faría un excelente campionato logo de meterse na final B dos 200 m. acadando a terceira posición e a sétima na xeral cun rexistro de 25.44.
Cristina Garrido Cabello da Sociedad Gimnástica de Pontevedra corría as súas semifinais dos 60 m. en 7.86 logrando acceder á final onde rebaixaba o seu rexistro ata os 7.81 logrando un excelente sétimo posto. Cristina Garrido daba a sorpresa ao se colar na final dos 60 metros lisos por tempos. Xa na carreira final, tivo que rachar cos seus propios récords personais para acanzar finalmente esa sétima praza. A marca de 7.81 facía que a velocista marchase moi leda dun nacional no que, según marcaba o ránking previo, non contaba con estar entre as atletas seleccionadas.
Outra das finalistas sería a céltica Uxía Paz quen no concurso de triplo saltaba ata os 11.57 m. no seu primeiro intento que lle daban o sétimo lugar do concurso.
Nos 60 metros valos Lucía Ferrer, da Sociedad Gimnástica de Pontevedra ocupaba a sexta posición na semifinal da proba cun tempo de 9.08. Coma acontecera no caso de Garrido, Lucía Ferrer tamén deu a badalada neste campionato estatal. A galega era a atleta que contaba con menos competicións nas súas pernas dentro da representación do seu equipo. Pero iso non supuxo un hándicap para a velocista. Este Campionato de España Sub23 foi a súa segunda proba de 60 metros valados desta tempada. Nela mellorou a súa mellor marca do ano con eses 9.08.
A representación galega masculina neste Campionato de España Sub23 de atletismo
Fantástico concurso de Alex Barreiro quen xa no segundo salto deixaba claro a súa aspiración aos metais neste estatal sub23 chegando ata os 15.09 m. e acadando o subcampionato nacional. Con este rexistro mellora a súa MMP nun centímetro do ano pasado ao aire libre onde de igual modo, foi bronce nacional. Pola súa parte, Sergio Coello do Real Club Celta noveno no concurso de lonxitude con 6.53 m.
Novamente os valos tiveron acento lucense ca presenza de Santi Rozas do Lucus Caixa Rural Galega quen nas semis lograba con 8.50 meterse na final para rematar oitavo con 8.51
Do resto das actuacións destacamos ao sadense Kristian Krasnov quen corría a súa semifinal dos 400 m. en 50.48 ocupando a sexta posición o mesmo que Lucas Fernández do Coruña Comarca quen pola súa banda marcaba un crono de 1:56.12 nos 800 m. entrando cuarto na súa serie.
