O Concello de Camariñas acolleu a terceira e penúltima xornada da Copa Galicia Resistencia coa proba 3H Resistencia Ruta da Caramiña. Baixo o faro do cabo Vilán, a ciclista Eva Ortega, do Extol MTB Team, corouse como campioa. Con todo, María Martínez, do Armenteira e Punto, segue líder da competición a falta dunha xornada.
No apartado masculino, o CDM Xesteiras ocupou o podio absoluto ao completo, co máster-40 Iván Pereira e os máster-30 Daniel García e Manuel Ángel Parada, líder absoluto da Copa.
Con dous centenares de bikers en liza, por primeira vez no certame autonómico posto en marcha esta temporada disputáronse tres categorías de parellas.
O tempo solleiro, ao igual que nas dúas anteriores citas desta Copa Galicia Resistencia, acompañou ao pelotón do evento organizado pola Peña Ciclista Baikers do Vilán. O trazado de Camariñas contou cuns 6 quiómetros de lonxitude e 140 metros de desnivel positivo acumulado.
Empate na xeral da Copa Galicia Resistencia
Ausente o domingo anterior en Boiro, pola coincidencia coa Copa de España XCM, Eva Ortega regresou con forza ao calendario autonómico. Segundo apunta a Federación Galega de Ciclismo, a representante do Extol deu en 2:56:14 nove voltas ao circuíto, unha máis que as tamén elites Diana Blanco (Bicicletas Chinquena) e María Martínez, segunda e terceira respectivamente.
Ver esta publicación en Instagram
A biker do Armenteira e Punto mantén grazas ao seu terceiro posto a camisola de líder absoluta feminina da Copa Galicia Resistencia, empatada a 300 puntos coa vencedora en Camariñas. Rebeca Nieto (Vara e Pedal) terminou como primeira máster.
A falta dunha xornada, a deste vindeiro domingo en Muros, os Rankings individuais por grupos de idade teñen á fronte ao júnior Ricardo Liste (Compostelano), á elite Eva Ortega, ao elite David Fernández, ao máster-30 Manuel Parada, ao máster-40 Iván Pereira, á máster Rebeca Nieto e a Juan Manuel Expósito no máster-50/60.
Estrea da competición por parellas
A Copa Galicia Resistencia ofrece ademais a opción de participar por parellas e a competición de dúos femininos estreouse en Camariñas. Por primeira vez tomaron a saída tandems de mulleres, con María Jesús Veiga (Quercus-Aper)-Begoña Espina (Narón) anotándose o triunfo ao superar a Andrea Pousada (Poio Bike)-Jana Buba (Coruxo).
Tamén se rexistrou o debut da parella Lara Lois-Fernando Guerra (Extol), dominadores da clasificación mixta por diante de Mónica Alarcón-Iván Vidal (Louriña), segundos, e dos líderes Sonia Costoya-Javier Baúlde (Corbelo).
Onde se mantivo a tónica habitual foi nos dúos masculinos, prologando a dupla Uxío Canosa-Jorge Pérez (Os Esfola Arrós) a súa condición de invictos. Aos líderes escoltáronos no podio Antonio Mato e Jesús Martínez (Toxo), segundos, e Iván Fernández e Daniel Rodríguez (Ourense Termal), terceiros.
A cerimonia de entrega de premios contou coa presenza de Sandra Insua, alcaldesa de Camariñas; Fabián Canosa, concelleiro de Educación e Deporte; Encarna Liñeiro, concelleira de Cultura, Encaixe e Turismo; representantes da P.C. Baikers do Vilán; e de Óscar Sánchez, directivo da Federación Ciclismo Galego.
