A futbolista galega Eva Dios, que milita no RC Deportivo, foi convocada pola Selección Española sub19 na preparación do Campionato Europeo do 2021, que finalmente será posposto. A deportivista e as súas compañeiras do combinado estatal non poderán competir a nivel europeo este ano.
O Comité Executivo da UEFA anunciou este martes, 23 de febreiro, a decisión de anular o torneo debido á actual situación sanitaria por mor da COVID-19. A fase final desta competición estaba programada para ser disputada en Bielorrusia.
Ante as actuais restriccións, moitas Seleccións non poderían ter viaxado para disputar os encontros, polo que de mutuo acordo coas Federacións membro tomouse a decisión de suspender o campionato.
Desta forma, a xogadora do Dépor ABANCA Eva Dios non poderá vestir a camisola vermella no torneo. Porén, esta non era a súa primeira experiencia nun competición europea. A futbolista formara xa parte do combinado que no 2018 obtivo a medalla no Campionato de Europa de Fútbol Sala para persoas sordas disputado en Finlandia.
Outras cancelacións internacionais
A COVID-19 segue cambiando plans a nivel internacional. Xa no pasado mes de novembro, a UEFA informou da suspensión do Campionato do Mundo sub20, do que nun principio ía formar parte a tamén xogadora do Dépor ABANCA Athenea del Castillo.
Como a súa compañeira de equipo no RC Deportivo, Eva Dios, a branquiazul quedará neste 2021 sen aspiracións a nivel internacional ao non poder disputar a competición.
