- A inauguración da peña Tralla Brava congregou a numerosas persoas desta agrupación branquiazul, así como a directivos da Federación de Peñas, deportistas do RC Deportivo como Eva Dios, Millene Cabral, Barbero e Dani Barcia, e tamén ao conselleiro Carlos Ballesta.
Son arredor das oito da noite dun día entre semana e na esquina da rúa San Vicente con Diego Delicado, no barrio dos Mallos da Coruña, as cores branquiazuis dominan a contorna e unha morea de xente con bufandas e camisetas deportivistas están ás portas do bar Esquina de Oro. Parece un día de partido coa afección en modo previa, pero non. Trátase dun acto diferente, pero o ambiente confírmanos que estamos no sitio correcto.
Queríamos vivir con dúas das nosas a inauguración da peña deportivista Tralla Brava e aquí están Eva Dios e Millene Cabral rodeadas de seareiras e seareiros. Tamén os xogadores deportivistas Barbero e Dani Barcia e o conselleiro Carlos Ballesta, historia viva do deportivismo. Todos eles acudiron a esta cita en representación do RC Deportivo.
Eva Dios: “Dá gusto ver como nos seguen”
Logo de falar coa afección, de tomarse fotos e de asinar autógrafos, Eva Dios preguntada pola ilusión que despertaba na afección máis nova a presencia das e dos futbolistas comentaba: “dá gusto ver como nos seguen, queren estar con nós e coñecernos un pouco máis”.
O certo é que a semente das novas xeracións agroma neste colectivo coruñés de seareiros e seareiras que zumega un ambiente familiar no que a veteranía e a mocidade mistúranse con naturalidade.
A paixón polas cores semella pasar de nais e pais a fillas e fillos nesta peña de que se creou hai xa un ano pero na que moitas das persoas socias levan unha chea de tempadas deportivistas ao lombo. Seguramente alguén dos presentes chegaría a ver sendo un neno ou unha nena ao Karbo Deportivo. O xérmolo do que é o hoxe o Dépor ABANCA.
Estamos, de feito, a escasos 250 metros do Colexio Karbo, o lugar de orixe do club de fútbol feminino que namorou á Galicia e ao resto de España nos oitenta e que foi berce das arelas de seren futbolistas de mozas da bisbarra coruñesa que se cadra aínda hai pouco que colgaron as botas.
Pero hai décadas xa diso e hoxe as mulleres futbolistas que acaparan a atención na inauguración da peña Tralla Brava non son do Karbo, trátase da dianteira brasileira Millene Cabral e centrocampista arousana Eva Dios. Ambas as dúas militan no Dépor ABANCA e comparten protagonismo con Dani Barcia e Barbero, tamén futbolistas do RC Deportivo. Todos eles asinan retratos e tómanse fotos coa afección.
Quen preside a Peña Deportivista Tralla Brava é Rubén Novo. Ten só 19 anos. Cóntannos que é o presidente máis novo dentro da Federación de Peñas Deportivistas.
“Agora mesmos somos máis dun cento. Levamos un ano funcionando”, conta Rubén Novo que explica que a peña “ten a sede nun bar de barrio, de xente de sempre, moitos xa teñen fillos. Imaxina o que é que sexas un neno e que veñan os xogadores do teu equipo ao teu barrio, neste caso Os Mallos, a asinar autógrafos e estar coa xente. Os maiores agradéceno, pero a cativada marcha para casa cun ‘subidón’ enorme”.
Millene Cabral: “Estamos ilusionadas loitando polo ascenso”
Na inauguración da peña Tralla Brava Millene Cabral confirmaba as boas sensacións que teñen as nosas deportivistas neste inicio de tempada que está a deixar un bo sabor de boca no bloque de xogadoras e na afección. Explicaba a brasileira que o “equipo está a vivir un momento moi bonito. Estamos todas moi contentas e ilusionadas para seguir loitando polo ascenso”.
O equipo que adestra Irene Ferreras é segundo a só dous puntos do líder, o RCD Espanyol de Barcelona. As Nosas deportivistas levan intercambiando o liderato coas pericas desde o arranque da competición neste curso 2023-24. Hai dúas xornadas que as catalás van por diante, pero a tiro de pedra das galegas.
A cativada xoga na a rúa e tamén no local adxacente ao bar Esquina de Oro habilitado para acoller o aumento de aforo da festa inaugural. Como cando se coloca unha grada supletoria para facer sitio a máis público nun partido crucial. Hai pouco que o Dépor ABANCA cambiaba a Cidade Deportiva de Abegondo polo Estadio ABANCA-Riazor para xogar un deses partidos especiais. Nas bancadas houbo 7.000 persoas alentando ás branquiazuis ante o Deportivo Alavés Gloriosas. Eva Dios lembraba ese partido e salientaba o apoio da afección para co Dépor ABANCA.
Explicaba a xogadora galega na inauguración da peña deportivista Tralla Brava como para as futbolistas do conxunto coruñés “é un luxo poder estar tan preto da afección e poder sentir o seu respaldo, ver canto nos apoian. Sobre todo estar preto da afección máis cativa e ver como nos apoian nesa loita para conseguir o obxectivo que estamos buscando”.
Eva Dios naceu na Illa de Arousa e chegou ao Dépor ABANCA B desde o Viaxes Interrías FF. A futbolista pontevedresa ten no seu palmarés unha medalla de bronce no Campionato de Europa de fútbol sala para persoas xordas en 2018, onde chegou a estar no cinco ideal do torneo. E acadou a internacionalidade coa Selección Española Sub-19 de fútbol. Esta tempada leva 7 partidos xogados e un gol co Dépor ABANCA.
Avanza a noite e, como cando pitan o final do partido, chega o tempo de recoller pancartas e bandeiras e marchar para casa. A xente da Tralla Brava está feliz de compartir paixón branquiazul, empanada e ata unha queimada elaborada ao berro de “Forza Dépor”, se cadra, para queimar os meigallos con lume purificador.
