Os Reis Magos trouxeron un agasallo moi especial para o ciclismo galego. Unha deportista galega pioneira nas dúas rodas únese ao cadro técnico da Selección de Galicia. Eva Castro (Oleiros, 1977) toma a remuda de Esteban Lorenzo á fronte dos combinados de Descenso e Enduro da Federación Ciclismo Galego, tal e como informa a propia entidade.
A nova responsable das especialidades gravity da Selección Galega é unha das mellores corredoras autonómicas de todos os tempos. No seu extenso palmarés destacan as medallas de bronce acadadas no Campionato de Europa de 4X no 2006 e na Copa do Mundo de 4X do 2007 celebrada en Vigo. Dez veces campioa de España de 4X e Dual, a nivel estatal tamén conquistou o Open de Descenso no 2011 e o Campionato de Enduro do 2013.
“A paixón que dende moi nova a levou a querer ir o máis rápido posible enriba da bicicleta, transmítea máis alá dos adestramentos e das competicións. Eva Castro abriu un camiño para o ciclismo feminino na nosa comunidade con resultados, involucrándose na reivindicación de instalacións e colaborando no fomento da base. Unha embaixadora con maiúsculas. Aos seus coñecementos deportivos hai que engadir os laborais, ao levar máis dunha década traballando no sector da bicicleta”, lembran desde a Federación.
Explican desde a Federación Ciclismo Galego que pola súa “experiencia e o seu perfil profesional, Eva Castro encaixa á perfección no proxecto deseñado polos actuais responsables federativos. Ademais, con esta designación continúa avanzándose no obxectivo de introducir e dar relevancia ás mulleres nos estamentos da Federación”.
A nova seleccionadora de DH-Enduro, Eva Castro, ocupará o posto que durante os últimos anos correspondeu a Esteban Lorenzo, a quen a Federación Ciclismo Galego “agradece a súa dedicación durante unha etapa cargada de éxitos para o BTT galego”.
