A atleta da Sociedad Gimnástica de Pontevedra, Eva Arias, vén de batir o récord galego nos 5 quilómetros en ruta. A deportista rematou o ano 2020 nunha das mellores formas posibles: batindo dúas veces a marca de Mercedes Gómez.
Na carreira popular de Cursa dels Nassos, Barcelona, Eva Arias logrou bater o récord galego de 5 quilómetros en ruta na categoría F40 cun registro de 17:40. O anterior tempo estaba en posesión de Mercedes Gómez que atesoraba un crono de 18.48.
A atleta do equipo pontevedrés entraba en 46º posición na liña de meta na xeral e como 16ª entre as féminas nesta carreira que ten ámbito internacional e que leva disputándose desde o ano 2011 en Barcelona nestas datas de Nadal.
Dase a circunstancia de que Eva Arias bateu xa tiña mellorado ese rexistro hai uns días na Sant Silvestre de Masnou, concretamente o 26 de decembro. Daquela, a corredora da Sociedad Gimnástica de Pontevedra parara o cronómetro en 17:59. Pero a súa fazaña non contou como mellor marca autonómica debido a que aquel circuíto non era homologado.
A atleta da entidade pontevedresa volveuno tentar uns días máis tarde e desta volta conseguiu rebaixalo en máis dun minuto. A deportista correu a un ritmo de 3:32 min/km.
A deportista declaraba que a carreira fíxoselle “algo dura porque o circuíto era pouco favorable”. Con todo, a fondista consegue pechar o ano 2020 dun xeito espectacular.