- O partido da novena xornada entre Rocasa e Mecalia Atlético Guardés disputarase sete días despois do previsto debido ao compromiso das galegas na European Cup contra o Juro Unirek neerlandés.
- A disputa da Supercopa de España o 17 e o 18 de decembro posibilita colocar o encontro, que se disputará en Gran Canaria, na amentada data e ás 19:30 (hora peninsular).
Como sucede cada ano, a disputa dos partidos de competicións europeas en fin de semana motiva alteracións de datas nos encontros ligueiros dos clubs implicados nas contendas continentais.
O Mecalia Atlético Guardés non é unha excepción. Por este motivo cambiou o seu encontro a oitava xornada contra Bera Bera, a disputarse inicialmente o 3 de decembro e xogado finalmente o pasado 16 de outubro; e fará o propio co da novena data, fronte a Rocasa Gran Canaria, que levará a cabo en Telde o vindeiro sábado 17 de decembro.
A terceira rolda da Copa Europea celebrarase integramente na Guarda a fin de semana do 10 e o 11 de decembro. Será o marco perfecto para a reinauguración da Sangriña. Unha volta perfecta a porto para a tripulación do Mecalia Atlético Guardés que capitanea Abel González.
Precisamente, para ese sábado estaba previsto o duelo fronte ao conxunto do Rocasa Gran Canaria. O habitual nestes casos é mover o choque ao mércores posterior ou anterior, pero a celebración da Supercopa de España o 17 e o 18 de decembro habilitou un día máis adecuado. Ese sábado 17, ás 19:30 (hora peninsular), no Pabellón Antonio Moreno de Telde, celebrarase o choque, un clásico da liga Guerreiras Iberdrola.