A colexiada de fútbol coruñesa Eugenia Gil foi galardoada recentemente como Mellor árbitra nos Premios MARCA del Deporte Femenino 2020-21. A deportista galega pita partidos de fútbol na Liga Iberdrola e tamén o fai na Terceira División galega. Ademais, compite como velocista en atletismo conseguindo tamén éxitos como atleta. Nas pistas, Eugenia Gil Soriano defende a camiseta da Sociedad Gimnástica Pontevedra. Leva pitando partidos de fútbol desde que tiña 14 anos.
Ao fío deste premio de Marca, Eugenia Gil Soriano era entrevistada pola Federación Galega de Fútbol. Nun vídeo publicado pola Federación Galega de Fútbol na súa páxina en Facebook a trencilla do Comité Galego de Árbitros manifestaba ante a cámara: “Queres ser a mellor, e sempre tentas ser a mellor, pero non pensas en que podes chegar a selo. Marca cre que fun a mellor. Adestro e traballo para superarme cada tras día, pero non o fago pensando nun premio”.
María Eugenia Gil Soriano conta nese vídeo que ao mirar “cara atrás e ver todos os anos que adiquei ao mundo arbitraxe (empecei con 14 anos), vexo que houbo moito traballo e moita dedicación. Houbo moitas caídas que fixeron que tivese que levantarme moitas veces. É un orgullo e unha satisfacción estar na Primeira División Feminina, coas mellores árbitras a nivel nacional. Isto é un incentivo para seguir traballando e tentar seguir facéndoo o mellor que poida e rompendo fronteiras”.
Eugenia Gil: “Hai 4 mulleres na Iberdrola, 3 na Terceira e 1 na Preferente”
Tal e como lembra Eugenia Gil Soriano, o colectivo arbitral galego “ten catro mulleres na máxima categoría feminina. Tres mulleres na Terceira e unha na preferente autonómica. Hai un traballo moi bo do comité galego que está no bo camiño. Dannos moitas ferramentas para poder mellorar día tras días. Somos unhas afortunadas ao estar arbitrando fútbol masculino e feminino. É un orgullo que catro mulleres galegas estén na máxima categoría”.
A colexiada galega Eugenia Gil Soriano anima a outras mulleres a apuntarse á arbitraxe: “É o momento da muller. Estamos a romper fronteiras, a que queira é benvida. Fan falta máis mulleres”
De cara a outras mulleres Eugenia Gil Soriano dixo: “O tren só pasa unha vez e tes que estar no momento e o no lugar idóneo. Tes que montarte. É o momento da muller. Estamos a romper fronteiras, a que queira é benvida. Fan falta máis mulleres. Non se van a arrependir. SE miro atrás non pensaba que isto podería pasar. Cada vez hai mellores condicións. É o momento para romper fronteiras e sei que unha muller chegará pronto no ámbito arbitral a facer historia”.
Peleteiro e Eugenia Gil, dúas galegas distinguidas nos ‘Premios MARCA del Deporte Femenino 2020-21’
