Sete anos despois, a atleta e árbitra Eugenia Gil Soriano consegue o ascenso de categoría e pitará na Terceira División.
A galega foi a número un da categoría, converténdose así na primeira muller de Galicia en quedar na primeira posición en preferente. Desta forma, Eugenia Gil venceu o premio Carreira Abad por ser a mellor colexiada da división.
Así mesmo, a árbitra é a primeira coruñesa en ascender a Terceira División como árbitra principal. Gil foi unha dos tres árbitros que a vindeira tempada estarán na categoría de bronce, xunto a Iván García e Marcos Padín, de entre os 21 que optaban á promoción.
A Real Federación Galega de Fútbol fixo público tamén o novo listado de colexiados da Segunda División RFEF e asistentes autonómicos.
As probas da Futgal
Na pasada fin de semana, Futgal levou a cabo o curso de ascenso de arbitraxe, con 36 colexiados competindo pola promoción, sendo só dous delas mulleres.
As aspirantes ao ascenso citáronse en Santiago de Compostela, no campo de fútbol de Chaian, en Trazo, para realizar dous controis a primeira hora da mañá: velocidade (6×40 metros) e resistencia (proba intermitente Yo-Yo) para os árbitros e velocidade (5×30 metros) e resistencia (proba intermitente Ariet).
Unha vez realizadas as probas físicas, a actividade trasladouse á sede da Real Federación Galega de Fútbol en Santiago de Compostela, coa benvida do presidente Bernardino González Vázquez e acto seguido, a realización da proba de redacción de actas para os árbitros aspirantes a Terceira División RFEF.
Despois de xantar retomouse a programación do curso de ascenso cos restantes exames técnicos: proba de regras de xogo, estatutos e regulamentos da RFEF e RFGF, exame de inglés e proba de xogadas de vídeo.
