A Liga Galega de Fútbol Gaélico segue avanzando e coa celebración da terceira xornada, por primeira vez na tempada puideronse disputar os dous partidos programados. Estrela Vermelha e Turonia foron os vencedores da fin de semana, impoñéndose a Auriense e Fillas de Breogán respectivamente. Herdeiras de Dhais descansou nesta xornada.
O duelo entre o Auriense e o Estrela celebrouse campus universitario ourensán, nun día marcado polo mal tempo. O cadro local chegaba ao partido marcado pola falta de efectivos, aínda que disputou unha boa primeira parte que impedía que as compostelás se adiantaran comodamente no marcador, aínda que o descanso chegou con vantaxe para as visitantes.
Xa na segunda parte, as vermelhas aproveitaron as escasas rotacións do Auriense para facerse co encontro, aumentando a intensidade e o ritmo e afianzando a vitoria por un 34-21.
A outra cita da xornada de fútbol gaélico tivo lugar en Samil, onde o Turonia-Independente vencía ao Fillas de Breogán. O conxunto local comezaba con forza o duelo, adiantándose rapidamente no electrónico cunha inspirada Eva Domínguez.
Tamén neste partido a falta de xogadoras no banco marcou ao equipo perdedor. As coruñesas competían sen suplentes, pero con enerxía para deixalo todo no campo. Así, o partido converteuse nun duelo entre Domínguez para as locais e Fontán para as visitantes.
No tramo final, as de Samil baixaron marchas, e as visitantes aproveitaron para recortar distancias. Porén, a vantaxe conseguida previamente marcou o devir do encontro, que remataría nun 18-11.
Actualmente, a táboa está liderada por Estrela Vermelha, quen suma dous puntos e unha vitoria nun partido disputado. A segunda posición é para Turonia, tamén con dous puntos e un balance dun triunfo e unha derrota. Na mesma situación está o Fillas de Breogán e o Auriense. Pecha a clasificación o Herdeiras de Dhais, cunha derrota nunha xornada celebrada.
