Ser primeiras a falta de dúas xornadas por disputarse é síntoma da solidez amosada durante todo o campionato de Liga. Por primeira vez na súa historia, o conxunto do Estrela Vermelha conquista o máximo título do fútbol gaélico feminino galego, faino antes de rematar a competición atesorando 18 puntos e cunha diferencial de +133.
Fíxoo sen perder ningún partido durante toda a competición, impoñéndose a conxuntos do nivel das Herdeiras de Lalín, que defendía título, as Fillas de Bregoán ou as Irmandinhas da Estrada, que xa conseguiran o título en pasadas edicións.
Así está táboa co Estrela Vermelha líder
Agora mesmo, e coa competición sen rematar, as inmediatas perseguidoras do Estrela Vermelha de Compostela son o bloque do Auriense de Ourense con 9 puntos, seguidas das Herdeiras de Dhais de Lalín con sete puntos. Fillas de Breogán (ACoruña), Keltoi (Vigo) e Independiente están empatadas a 6 puntos e pechan a táboa as xogadoras do Turonia (Gondomar).
As rapazas do Estrela Vermelha escriben pois, con letras douradas o seu nome no libro do fútbol gaélico feminino galego, xa que son o cuarto conxunto en proclamarse vencedor.
Queda pendente de disputarse unha última xornada e un partido adiado da anterior entre Fillas de Breogán e Herdeiras de Dhais.
