Os primeiros tres puntos do Dépor ABANCA colleitáronos As Nosas deportivistas en Riazor diante do Athletic Club, nun partido no que loitaron por ese triunfo diante dun rival chamado a ser un ano máis un dos destacados na Liga F e que llelo puxo complicado nomeadamente a balón parado.
Inês Pereira e Ainhoa Marín foron unha vez máis decisivas. Unha baixo paus e a outra na ofensiva. A liña de tres conformada por Barth, Elena e Raquel foi moi solvente e estivo reforzada nas bandas por Samara e Monteagudo. As galegas souberon sufrir cando non tiñan o balón e conter os ataques a balón parado das vascas.
Arrincou o partido o Dépor ABANCA aplicando ao Athletic Club unha asfixiante presión alta. Con todo, a primeira ocasión de chegar á portaría rival foi para as vascas nun saque desde o curruncho no que o esférico paseuse pola área pequena sen chegar a perforar a meta de Inês Pereira. A balón parado as de Bilbao levaron perigro todo o partido. Buscaba a liña de fondo non tanto para crear ocasións en xogada como para provocar un córner que lles fixera sacar a súa artillería neste tipo de xogadas.
Superados os 17 minutos de xogo sacaba a pelota de puños Inês Pereira safando o perigo da súa portaría.
Consumidos 20 minutos de partido Olaya avanza pola esquerda acompañada por Ainhoa Marín polo centro. A asistencia da primeira pintaba ben para a catalá, pero adiantóuselle o balón e chapou a Nanclares para o Athletic Club. A xogada estaba invalidada por fóra de xogo, pero Riazor sentiu que se podía levar perigo á área rival. Ao poco tempo volveu intervir Inês Pereira por unha nova acción a balón parado que era o xeito de levar perigo das bilbaínas.
Contra o minuto 26 de partido, Nerea Nevado entrou pola dereita. Facíalle a cobertura Elena. A de Carballo non puido impedir que a de Santurce chegase a rematar. Non pasou do susto xa que volvía a intervir con seguridade e acerto e volve intervir con acerto Inês Pereira atallando o tiro cruzado da roxibranca.
Con media hora de encontro consumida, Ainhoa Marín rouba un balón en medio campo e avanza acompañada de Bárbara que se queda cunha defensa e envía a dereita de volta a Ainhoa Marín que bate á cancerbeira visitante para anotar o 1-0 para o Dépor ABANCA. Así se chegaría ao descanso coas Nosas deportivistas por diante no electrónico de Riazor.
Aos dez minutos de partido da segunda metade Bárbara entraba pola esquerda do ataque deportivista. Meteteuse á area Monteagudo que remataría a pelota forzando un córner que no iría a máis. Uns minutos máis tarde sería outra vez Ainhoa Marín quen levaría o perigo á meta visitante cun pepinazo desde fóra da área que pasa polo medio de todas xogadoras, atacantes e defensoras, ata que chapa a porteira visitante.
Moveu o banco cun triple cambio Fran Alonso. Entraron Marisa, Henar e Paula Novo deixándolles o sitio Monteagudo, Paula e Bárbara. Foi precisamente Marisa quen contra o minuto 38 da segunda metade envíaría un disparo por fóra dos tres paus. O seu tiro fóise pola dereita.
Entraron tamén no campo Redru por Lucía e máis tarde, Cavanagh por Samara.
O Dépor ABANCA aguanta os ataques do Athletic no desconto
Achuchou o Athletic Club de Bilbao no tempo engadido, pero unha vez máis Inês Pereira deixóu clara a súa calidade. Con todo a MVP do partido foi Ainhoa Marín que adicou o seu gol á capitá Cris Martínez, que, na recta final do seu embarazo, viu o partido desde a grada e ao final do choque baixou ao campo a festexar os +3 das deportivistas con todo o bloque de futbolistas branquiazulis.
O Dépor ABANCA suma dous empates 1 unha vitoria. Tras tres partidos está invicto e só recibiu un gol no que vai de Liga F.
Nas filas visitantes varias futbolitas internacionais coa Selección Española absoluta: Nanclares, Nerea Nevado e Zubieta, e varias en categorías inferiores como Elexpuru ou Agote. Non foron tres puntos colleitados fronte un rival calquera. Foron tres puntos gañados con esforzo e cabeza. Saber sufrir é un bo fondo de armario para asegurarse puntuar en partidos ante rivais complicados coma o desta xornada.
Ver esta publicación en Instagram
FICHA TÉCNICA
1) DÉPOR ABANCA: Inês Pereira, Samara Ortiz (Cavanagh, min. 88), Paula G. (Henar, min. 64), Olaya, Monteagudo (Paula Novo, min. 64), Ainhoa Marín, Raquel, Bárbara (Marisa, min. 64), Elena, Lucía Martínez (Redru, min. 78) e Barth
0) ATHLETIC CLUB: Nanclares, Maddi (Landaluze, min. 62), Valero (Oihana, min. 84), Zubieta (Oguiza, min. 78), Azkona (Sanadri, min. 78), Baños, Nerea Nevado, Ortega, Elexpuru, Campos (Vilariño, min. 62) e Agote
EQUIPO ARBITRAL: Ylenia Sánchez, do comité catalán. Amoestou a Campos (min. 23), Monteagudo (min. 52), Landaluze (min. 66) e Barth (min. 90).
GOLES: 1-0 Ainhoa Marín (min. 30).
INCIDENCIAS: Encontro correspondente á 3ª xornada en Liga F disputado en ABANCA-RIAZOR ante 1.015 espectadores nas bancadas do estadio herculino.
Ver esta publicación en Instagram
