Os primeiros clasificados do Raid Gallaecia–AR World Championship 2021 xa están no Hotel Balneario Caldaria de Laias, escenario da terceira transición (T3) do percorrido. Os equipos desembarcaron tras un longo sector de kaiak: 90 quilómetros atravesando os ríos Sil e Miño.
O Estonian ACE Adventure-A Sportiva estoniano mantiña o liderado do Campionato do Mundo de carreiras de aventura ao seu paso pola localidade ourensá, desde onde arrinca o cuarto segmento e o máis longo do trazado: 210 quilómetros de bicicleta de montaña con final nas Pontes.
Máis de 2 días case sen parar no Raid Gallecia AR World Championship
O conxunto estoniano, que chegou aos pontones de Caldaria ás 13:34 horas, aproveitou a T3 para tomarse un descanso, o primeiro en condicións despois de 292 quilómetros, unha distancia que cubriu en 2 días, 1 hora e 34 minutos sen parar.
Ao paso pola baliza 19, onde os participantes tiveron que portear os kaiaks para superar o encoro de Velle, á entrada de Ourense, os suecos Swedish Armed Forces Adventures (SAFAT) e Orbital Adventure Racing picaron en segunda e terceira posición.
O Blizzard ruso, que saíu segundo da T2, perdeu varios postos ao non atopar o anterior check-point, noutro porteo para evitar o encoro de Santo Estevo, en plenos Canóns do Sil. Ao seu paso por Ourense lideraba un terceto xunto ao español Torpedo Vidaraid e ao tamén sueco NIAR Adventure Racing.
O primeiro corte do Raid Gallaecia-AR World Championship 2021 realízase en Quiroga. Todos os equipos que non chegasen a tempo serán repescados se o desexan. A organización trasladaraos até As Pontes, desde onde continuarán a carreira, aínda que fóra de clasificación, unha vez pasasen os primeiros clasificados.
