“O Mecalia Atlético Guardés 2025/2026 vivirá unha importante ausencia, aínda que polo mellor dos motivos. A gardameta Estela Carrera anunciou este martes nas súas redes sociais persoais que será nai nos próximos meses, motivo que a apartará do 40×20 ata, cando menos, a seguinte tempada. A encargada de ocupar o seu lugar baixo paus será precisamente a última adquisición do equipo miñoto, a francesa Amandine Balzinc“, así anunciaba o conxunto da Guarda a baixa por maternidade da súa cancerbeira.
Estela Carrera: “O reto máis grande e bonito da miña vida está en camiño”
Este martes 29 de xullo, a eldense Estela Carrera anunciaba a través dunha fotografía nas súas redes sociais persoais que se enfrontará ao “reto máis grande e bonito” da súa vida: a maternidade, estaba “en camiño”.
Ver esta publicación en Instagram
A gardameta do Mecalia Atlético Guardés, que recentemente renovara o seu acordo co Club para seguir vestindo a súa camiseta esta tempada 2025/2026, finalmente seguirá formando parte do equipo durante este curso, pero dun xeito diferente.
A porteira xa iniciou a súa baixa e, aínda que estivo presente no primeiro adestramento desta semana para recibir ás súas novas compañeiras e apoiar ás xa coñecidas, non compartiu xa a pista con elas.
Ver esta publicación en Instagram
Así, Estela Carrera manterase afastada do xogo por este motivo ata, cando menos, o próximo curso 2026/2027. Namentres, o seu lugar baixo paus estará cuberto a mans da francesa Amandine Balzinc, a derradeira fichaxe anunciada polo equipo miñoto, que non será finalmente a terceira gardameta do plantel como puido especularse nos últimos días.
O Mecalia Atlético Guardés expresaba nun comunicado remitido aos medios “os seus infinitos parabéns a Estela Carrera e a súa familia e deséxalle o mellor neste emocionante camiño. Estaremos esperándote á túa volta!”
