Lete Lasa destacou a “incrible carreira de Esperanza Barreras, que xa suma, coas tres medallas acadadas en Copenhague, nove medallas nos últimos catro mundiais, sendo seis de ouro e tres de prata”. O secretario xeral para o deporte puxo en valor o feito de que “a mellor deportista de Stand-Up paddle do mundo sexa muller e galega”.
O secretario xeral para o Deporte, José Ramón Lete Lasa, participou na recepción á deportista galega Esperanza Barreras, que vén de acadar tres metais -ouro en longa distancia, prata en carreira técnica e outro ouro por equipos- nos Campionatos do Mundo de Stand-Up paddle e paddleboard celebrados en Dinamarca.
O secretario xeral fixo fincapé na orixe nigranesa de Esperanza Barreras, concello pontevedrés no que se atopa o Núcleo de Adestramento Deportivo Especializado da Federación Galega de Surf. Neste sentido, Lete Lasa destacou o nivel tanto de profesionais experimentados como Espe e tamén dos rapaces máis novos do Núcleo de Entrenamiento Deportivo Especializado (NADE), advertindo que, “Galicia está en disposición de aspirar a ter algún representante olímpico nos Xogos de Brisbane 2032”.
Dentro desta combinación dos deportistas absolutos asentados no alto nivel coa canteira que comeza a despuntar, Lete Lasa subliñou a importancia de que Esperanza Barreras tamén de desempeñe na formación de novos valores como fai no Club IMUA de Aguete cando está en Galicia.
O secretario xeral apuntou que é “moi importante” que nun deporte que ten un forte impacto nos máis novos, “a mellor deportista do mundo dunha das súas disciplinas sexa muller e sexa galega” xa que representa un aliciente para todos os nenos e nenas e contribúe a igualdade dunha federación que xa é das que conta cun mellor reparto entre sexos.
