España empeza a súa concentración para preparar a UEFA Women’s Nations League con Teresa Abelleira nas súas filas

Selección de España feminina de fútbol vén de iniciar a súa última concentración do ano 2023 e faino con vistas a preparar os partidos da UEFA Women’s Nations League que disputará o combinado español os días 1 e 5 de decembro en Pontevedra e Málaga. Teresa Abelleira forma parte da convocatoria de Montse Tomé na que tamén están outras xogadoras vinculadas a Galicia, falamos das ex deportivistas: Misa, Athenea del Castillo e María Méndez. 

O primeiro dos encontros de España vaise xogar en Pasarón ante Italia. O segundo será contra Suecia na Rosaleda. O equipo que prepara a adestradora Montse Tomé buscará selar o seu pase ás semifinais do campionato para despois pelexar por unha praza nos Xogos Olímpicos de París 2024.

Teresa Abelleira, en Pontevedra coa Vermella

A Selección Española chega ao Estadio de Pasarón como campioa do Mundo e coa galega Teresa Abelleira nas súas filas.  Xunto a ela outras tres ex do Dépor ABANCA: Misa, Athenea del Castillo e María Méndez. 

A cidade de Pontevedra vai poder gozar do xogo da selección campioa do Mundo o próximo venres 1 de decembro no Estadio de Pasarón. A veciñanza pontevedresa vive, desde a pasada fin de semana vive o ambiente deste partido da man de varias accións que puxo en marcha a Real Federación Española de Fútbol xunto coa RFGF.

A futbolista galega Teresa Abelleira poderá cumprir un dos seus grandes soños. A xogadora pontevedresa xogará coa Selección Española diante da súa xente, dos seus familiares, amigos e veciños, e farao como campioa do Mundo e como unha das xogadoras referentes do combinado estatal.

@teresabelleira

A @SEFutbolFem comezou este luns a súa concentración para preparar a dobre cita ante Italia e Suecia

España xogará o venres en Pontevedra e Tere cumprirá o seu soño

https://t.co/dchHMhxEXT pic.twitter.com/jEY6bulCn3

— RFGF (@futgal) November 27, 2023

Exposición fotográfica ao aire libre sobre o Mundial de futfem

En Pontevedra pódese ver estes días unha exposición, elaborada ex profeso para acompañar á Selección Española feminina, plantexada para que poida ser itinerante por toda a xeografía de España.

A exposición fotográfica consta de 5 módulos, con imaxes a gran formato sobre a consecución do Mundial de futfem 2023 por parte de España.

Exponse como un discorrer cronolóxico desde a fase de grupos ata a final contra Inglaterra. En concreto, son 17 imaxes a gran formato que non só fan referencia aos partidos en si mesmos, senón tamén a momentos concretos de anguria, felicidade e emoción presentes nas xogadoras.

O título da mostra é “A viaxe cara á estrela” e con ela preténdese facer fincapé no longo percorrido que supón poder chegar a conseguir este título. Ademais, esta exposición será sensible ás particularidades das comunidades históricas, polo que tanto en Galicia como en Pais Vasco ou Cataluña, en caso de levala, os textos serán bilingües.

En Pontevedra estará ata o mesmo día do partido, 1 de decembro e está ubicada no Edificio Castelao da cidade do Lérez. Posteriormente trasladarase a Málaga.

Agárdase un cheo en Pasarón para ver as campioas do Mundo

Ao mediodía do pasado xoves 23 de novembro saíron á venda as entradas para o partido internacional feminino entre as seleccións de España e Italia que se vai disputar o venres 1 de decembro no Estadio Municipal de Pasarón, en Pontevedra.

A acollida foi extraordinaria, masiva e o coliseo lerezano colgará o cartel de non hai billetes para ver á campioa do Mundo. Máis da metade do aforo do estadio foi adquirido polos clubs de fútbol feminino de Galicia mediante unha promoción que sempre fai a Real Federación Española de Fútbol para este tipo de encontros. Estamos, sen dúbida, ante a gran festa do fútbol feminino en Galicia.

España lidera o Grupo D

A Selección Española lidera o grupo D nesta UEFA Women’s Nations League tras vencer a Suecia (2-3) e a Suíza (5-0), o pasado mes de setembro, e de triunfar, en outubro, na súa visita a terras italianas (0-1) e helvéticas (1-7).

España medirase con Italia no Estadio de Pasarón de Pontevedra o día 1 de decembro, ás 21:30 horas, e no Estadio da Rosaleda de Málaga o día 5 do mesmo mes, en horario aínda por definir.

O obxectivo das campioas do Mundo é seguir contando os partidos por vitorias e lograr a definitiva clasificación para a fase final a catro da Women’s Nations League.

Espérase que o partido en Pasarón sexa unha gran festa do fútbol feminino e unha oportunidade para que a afección galega poida desfrutar do xogo da vixente campioa do Mundo de preto.