Terceiro título europeo para a Selección Española de fútbol sala feminino. As vermellas que dirixe Clàudia Pons son tricampioas de Europa logo de gañar na final 1-5 a Ucraína. Todos os goles de España tiveron ‘acento’ galego. Anotaron: Ale de Paz, Peque, Dany e Irene Samper (2).
Das 14 convocadas para este reto catro eran galegas (Silvia Aguete, Ale de Paz, Luci Gómez e Antía Pérez) e tres máis xogan nun equipo galego, o Burela (Peque, Irene Samper e Dany). Entre todas suman sete, a metade do equipo. E no recordo de todas na celebración, outra galega: Vane Sotelo.
O marcador fala da autoridade e a rotundidade coa que España se impuxo a Ucraína na final do Campionato de Europa de futsalfem. As vermellas lograban o seu terceiro título continental vencendo a Ucraína 1-5 no partido definito. Previamente impuxéranse 3-2 a Portugal en semifinais. A Selección Española xa tiña nas súas vitrinas os trofeos de 2019 e 2022.
O conxunto que adestra Clàudia Pons, única seleccionadora do torneo, colocábase por diante no marcador aos 13 segundos cando Peque, a MVP deste Europeo, anotaba un penalti no seu 101 partido como internacional. Ese gol é, ata o de agora, o gol máis rápido da competición. Outro fito para esta futbolista que superaba o cento de encontros demostrando con goles que a súa traxectoria na Selección Española vai para longo.
Ucraína tentábao con disparos afastados que se atopaban sempre co bo tino da cancerbeira galega Silvia Aguete.
Tres a cero para España antes do descanso
O segundo gol 0-2 chegaba superados os dez minutos de xogo, tal e como recolle a RFEF. Foi obra de Irene Samper, outra das xogadoras do Burela FS. Aínda que se meteu en faltas, España evitou provocar un dobre penalti. Pola contra, a galega Ale de Paz, sumaba outro tanto para as españolas. A Selección Española poñía rumbo a vestiarios cun 0-3 ao seu favor.
De regreso do tempo de descanso, outra vez golpeaba España cun tanto no arranque que minaba as arelas das ucraínas. O gol foi de Irene Samper, que asinaba o segundo na súa conta particular (0-4).
O gol da honra para Ucraína, que non deixou de tentar chegar a porta, chegou no 36 por medio de Shulha (1-4).
Redondeou o marcador completando a man Dany, tamén futbolista do Burela FS. A co 1-5 foi no 37. Tres minutos despois, España era tricampioa de Europa.
Nos festexos, houbo lembraza especial para a galega Vane Sotelo, que non puido estar nesta fase final debido a unha lesión, pero si formou parte do equipo nos partidos previos.
Nas declaracións post partido Clàudia Pons, xa pensaba no Mundial. Será o primeiro Campionato do Mundo para un fútbol sala feminino que loitou moito por poder disputalo.
Clàudia Pons acadaba o seu terceiro título europeo, sendo, ademais, a única seleccionadora. Tal e como lembra a RFEF, Pons chegou ao cargo en 2018 e acumula 57 partidos, con 41 vitorias, oito empates e oito derrotas. Unhas cifras que falan do gran labor que está a realizar xunto ao seu corpo técnico.
A seleccionadora española falaba tras acadar o tricampionato de Europa sentir “moita satisfacción, foron anos complicados. Preparamos un Europeo en menos dun ano con baixas importantes e estou moi orgullosa de como o fixeron as xogadoras. O feito de gañar métenos máis presión, hai que aceptalo e esixirnos para seguir gañando. A clave é manter a fame e a ambición. Hai que pensar en novos retos como pode ser o Mundial”.
Clàudia Pons: “O feito de gañar métenos máis presión, hai que aceptalo e esixirnos para seguir gañando. A clave é manter a fame e a ambición. Hai que pensar en novos retos como pode ser o Mundial”
Amosando o trofeo de campioas de Europa Peque, MVP do torneo dicía: “Hai tres, e as tres, témolas nós”. Bravas!
FICHA TÉCNICA
1) UCRANIA: Kyslova, Dubytska, Shulha, Forsiuk y Hrytsenko. También jugaron: Babenko, Volovenko, Tytova, Skybina, Kyrylchuk, Diatel, Drozd, Terekh (p.s.) y Mytrofanska (p.s.).
5) ESPAÑA: Silvia, Mayte, Irene Samper, Peque y Dany. También jugaron: Laura Córdoba, Luci, María Sanz, Irene Córdoba, Melli, Ale de Paz, Noelia, Antía Pérez y Marta Balbuena (p.s.).
GOLES: 0-1 1′ Peque, de penalti. 0-2 11′ Irene Samper. 0-3 20′ Ale de Paz. 0-4 21′ Irene Samper. 1-4 36′ Shulha. 1-5 37′ Dany.
EQUIPO ARBITRAL: Mislav Dzeko (Croacia) y Dejan Veselic (Eslovenia). Amonestaron a las ucranianas Dubytska y Skybina y a la española Laura Córdoba.
INCIDENCIAS: Final Europeo 2023. Fönix Arena, Debrecen (Hungría).
