Un gol abonda para chegar á gloria. A Selección de España proclámase campioa do Mundo de fútbol coa galega Teresa Abelleira convertida nunha peza chave do combinado estatal. Venceu a Vermella pola mínima pero un solitario gol de Olga Carmona foi suficiente para marcar a diferencia e facer, unha vez máis, historia no futfem español.
A pontevedresa Teresa Abelleira foi das mellores futbolistas neste campionato. Marcou un gol nesta Copa do Mundo, por ela pasou boa parte do fútbol da medular da Vermella, as súas recuperacións de balóns e as súas coberturas foron cruciais. A súa visión de xogo é brutal. E na final o seu cambio de xogo propriciu o gol que fixo a España erguer o trofeo e poder sumar unha estrela ao carón do seu escudo.
Diferentes puntos do estado e tamén de Galicia instalaron pantallas para que a veciñanza puidese seguir o partido ao vivo conxuntamente. Había ganas de compartir un momento histórico e de celebrar.
Pontevedra, terra de Teresa Abelleira, Betanzos e A Coruña, cunha praza de María Pita que quería sumar á súa programación de festas un triunfo da Selección de Española.
O primeiro tiro a porta do partido foi das inglesas. Concretamente de Lauren Hemp. O seu disparo o atrapa Cata Coll con seguridade.
Ao cuarto de hora de xogo Inglaterra avisa cun disparo ao longueiro. A resposta de España chegou ao minuto seguinte cunha chegada clara na que Alba Redondo tivo unha ocasión nas súas botas que non foi quen de rematar.
No minuto 28 Olga Carmona anota o 1-0 nunha xogada que empezou cun cambio de xogo maxistral de Tere Abelleira á esquerda. E pola esquerda Olga Carmona internouse e tentou ver porta cun tiro raso cruzado coa zurda ao segundo pau. Imposible parar a pelota pese á estirada da cancerbeira inglesa.
No minuto 36 prodúcese un envío medido da galega Tere Abelleira que bota unha falta cara a Irene Paredes que tivo o centro e tamén colleu o rexeite intentando un disparo que case sorprende ás inglesas.
A última ocasión da primeira parte foi para España nas botas de Salma Paralluelo que lle pegou á pelota como puido conseguindo petar na base do poste. A piques de conseguir o segundo.
Á volta de vestiarios a adestradora de Inglaterra, Sarina Wiegman, fixo cambios de xogadoras e de esquema buscando máis chegada polas bandas das azuis.
Jorge Vilda fixo o seu primeiro cambio no minuto 61 metendo no campo a Oihane por Alba Redondo. Ao pouco dese cambio, Aitana Bonmatí intenta un disparo desde lejos que pasou por encima do longueiro a pase de Jenni Hermoso.
No minuto 63 chega a polémica. Nun rebumbio na área no que España non chega a rematar, prodúdese unha man dunha das xogadoras inglesas na área. Pídese VAR para verificar o posible penalti. A colexiada Tori Penso acude a ver a xogada á pantalla para ver a acción repetida e pita a pena máxima. Once metros para aumentar a renta da Selección de Española.
A encargada de tentar transformar a ocasión foi Jenni Hermoso e a cancerbeira Mary Earps detén o envío á dereita da española. Non puido anotar o segundo España.
A adestradora de Inglaterra, Sarina Wiegman, meteu máis xogadoras de ataque na recta final do xogo. Nun partido con moitas interrupcións e con previsión de bastantes minutos engadidos, o bo nivel físico de Inglaterra e que introduxera xogadoras ofensivas facía prever un final de partido complicado para España.
Jorge Vilda introduce a Alexia Putellas para buscar a portar á Selección a calidade indiscutible da futbolista española, que se ben non está ao seu nivel (sae dunha lesión) é certo que pode desequilibrar nunha xogada.
Foron 13 os minutos que a colexiada estadounidense engadou aos 90 regulamentarios da final do Mundial.
E cos trece cumplidos escoitouse o pitido final e estoupou a festa.
