Tanto nadar, para rematar por morrer á beira. Así podería resumirse o partido do CV Arenal Emevé nesta 14ª xornada da Liga Iberdrola. As xogadoras que adestra José Valle, fixeron honra ao seu alcume, loitadoras, e conseguiron remontar un 0-2 en contra. Pero, finalmente, perderon diante do Kiele Socuéllamos. As visitantes impuxéronse por un tanteo de 2-3 con parciais de 21-25, 15-25, 25-13, 25-18 e 13-15. Forzaron as galegas o quinto set, pero non evitaron a derrota.
As lucenses do CV Arenal Emevé suman un punto e boas sensacións na súa preparación para a Copa da Raíña Coa vista posta na Copa, que se disputará dentro dun mes, e tras un parón do Nadal máis longo do habitual polos positivos en ambos os equipos, Arenal Emevé e Kiele Socuéllamos medían forzas no Municipal e Lugo. A falta de actividade en ambas as dúas escuadras fíxose notar nos primeiros puntos, no que tanto as lucenses como as manchegas mostráronse moi dubitativas.
O primeiro set foi tremendamente igualado e marcado polo medo para fallar. Quen dese un paso adiante tiña todas as papeletas para levar o primeiro set e ese movemento efectuárono as de Socuéllamos.
Foron as primeiras en abrochar unha vantaxe de tres puntos (17-20) e foron con decisión a por a primeira manga. José Valle tentou cortar o ritmo cun par de tempos mortos, pero foi infrutuoso o movemento. O 0-1 subía ao marcador (21-25) tras 23 minutos de partido.
As xogadoras que adestra Chema Rodríguez viron o camiño para seguir e tras un arranque igualado do segundo puxeron a directa do 7-7 pasouse a un 11-17 que non auguraba boas noticias para as locais.
Quixo cambiar o libreto José Valle con varios cambios nas filas das loitadoras. No CV Arenal Emevé o técnico deu entrada a Marta Otero por Mariana Capovilla, Sara Urrea por Jimena Fernández e entregou a dirección do xogo a Ainara Burgo en lugar de Yael Castiglione.
A vantaxe das manchegas era moi folgada e ese movemento de pezas non produciu efecto no segundo set, pero tería incidencia no terceiro. A segunda manga apuntáronlla as visitantes 15-25, mercé á súa maior intensidade no xogo.
No cambio de set José Valle invocou aos espíritos do partido da primeira volta, onde as lucenses levantaron un 2-0 en contra. Na retransmisión escoitouse ao técnico de Abadín pedirlles ás súas mozas “ir a por o partido, atacar os puntos e tentar repetir o que xa fixemos”. As Loitadoras obedeceron as ordes e subiron moito a súa intensidade.
O terceiro período foi todo un canto á esperanza dun futuro brillante para o vóley galego xa que, con cinco xogadoras de Galicia sobre a pista durante a maioría do tempo, as lucenses voaron por encima dos seus rivais. O terceiro set foi para as locais por un contundente 25-13 e as pantasmas do pasado volvíanselle a aparecer a Kiele.
Enfronte, ás loitadoras, o Socuéllamos, un dos mellores equipos da Liga Iberdrola
O medo sentiu nas caras das visitantes cando o cuarto arrincou cun 4-1 que poñía a moral lucense polas nubes. Pero Socuéllamos é un dos mellores equipos da Liga Iberdrola e demostrouno repoñéndose ata o 7-8. Aí volveu mover ficha José Valle e desfixo os cambios. Yael e Jimena entraron para cambiar de novo o partido e levar ao seu equipo ata o desempate. Cun 25-18 o CV Arenal Emevé volvía levar o partido á morte súbita. Terceira da tempada nun Municipal que se está afacendo ás emocións fortes.
Co vento de cola as galegas arrincaron moi sólidas o set definitivo e tomaron tres puntos de vantaxes (3 0). Esa vantaxe madrugadora inxectou unha présa innecesaria ás loitadoras que adestra José Valle que cometeron varios erros ao forzar a máquina. A igualdade volvía ao electrónico e con ela chegouse ao cambio de campos, co CV Arenal Emevé 8-7 por diante. O intercambio de golpes foi constante pero xusto no momento preciso, Kiele Socuéllamos adiantouse e con dous puntos seguidos pechou o partido ao seu favor: 2-3.
Tras este partido o CV Kiele Socuéllamos marcha segundo na clasificación, dous puntos por detrás do Sanaya Libby,s La Laguna. Mentres, as galegas do CV Arenal Emevé de Lugo son sextas con 18 puntos no seu casilleiro.
🔚 FINAL en @cvemevelugo nos llevamos el tie-break 13-15 y el partido por 2-3 frente a un conjunto que nunca baja los brazos pic.twitter.com/PUpXVS2iL5
— CV KIELE Socuéllamos (@voleykiele) January 15, 2022
FICHA TÉCNICA
2) CV Arenal Emevé: Carolina Camino, Darlevis Mosquera, Inma Lavado, Mariana Capovilla, Yael Castiglione, Jimena Fernández e Lidia Figueira (Líbero)- sexteto inicial -. Tamén xogaron:, Marta Otero, Sara Urrea e Ainara
Burgo.
3) CV Kiele Socuéllamos: Alicia de Blas, Anna Walsh, Paula Carpintero, Agüero, Karina Suligoy, Amelia Portero e Patricia Rodríguez (Líbero) – sexteto inicial -. Tamén xogaron , Marina Saucedo, Benedito, Jovanovic e Álvarez
Serrano
PARCIAIS: 21-25 (23 min. ); 15-25 (21 min. ); 25-13 (19 min. ); 25-18 (23 min. ) e 13-15 (17 min. ). Estatísticas.
ÁRBITROS: Rubén Sánchez e José Real.
INCIDENCIAS: Partido correspondente á 14ª xornada da Liga Iberdrola, disputado no Pavillón Municipal de Lugo ante 500 persoas como espectadoras na bancada.
