- O alumnado do Centro de Educación Infantil e Primaria Fermín Bouza Brey do Concello de Ponteareas descobre as Loitas Olímpicas nunha divertida xornada de adestramento cos bonecos Wrestling Dummie.
O centro educativo pontevedrés CEIP Fermín Bouza Brey acollía no mes de decembro pasado unha actividade pioneira na loita olímpica española. A Federación Galega de Loita e D.A. (FEGALOITA) puxo en marcha cos alumnos de 5º e 6º de Primaria deste centro educativo a campaña de promoción da loita sen contacto e contra bonecos: Wrestling Dummie.
As limitacións derivadas da crise sanitaria da pandemia de COVID-19 obrigaron a reinventarse a esta modalidade deportiva, como outras moitas que requiren do contacto físico para practicarse. “A loita con dummies resulta unha alternativa segura, limpa e na que se minimiza o risco de contaxio. Tendo a un boneco como adversario, os deportistas poden demostrar o seu repertorio técnico, velocidade, forza e resistencia”, explican desde a federación Galega de Loita e Deportes Asociados.
O proxecto piloto de fomentar esta iniciativa arrincou cunha xornada lúdica e formativa celebrada en horario lectivo no mes de decembro pasado. Sobre o tapiz de 100 metros cadrados achegado pola Federación Galega de Loita e Deportes Asociados, as alumnas e os alumnos ponteareáns tiveron a oportunidade de descubrir esta actividade de “oposición directa”, sen adversario.
Os escolares gozaron derrubando aos bonecos das súas mesmas medidas durante unha sesión que contou a presenza de Daniel Benavides, xefe do Servizo Provincial de Deportes da Xunta de Galicia en Pontevedra; José Luis Soto, profesor titular de educación física do do CEIP Fermín Bouza Brey de Ponteareas; e dos técnicos da Federación Galega de Loita e Deportes Asociados.
Campaña de promoción do uso de Wrestling Dummie
O Wrestling Dummie estreouse, con gran aceptación, na 10ª Copa Deputación de Ourense. Segundo explican desde FEGALOITA, “o seguinte paso na súa promoción é esta campaña dirixida aos máis novos para achegarlles unha actividade que aplica un modelo centrado na aprendizaxe cun enfoque de competición adaptada. Nas exhibicións en centros educativos efectúanse accións simultáneas con catro alumnos ou alumnas e as cinco tarefas que levan a cabo combinan exercicios de forza, habilidades básicas como os saltos e proxeccións dos bonecos”.
“Ata o inicio da pandemia, as actividades de promoción de Loitas Olímpicas nos centros educativos centrábanse na práctica adaptada ao currículo escolar de cada grupo, pero o paradigma deportivo cambiou considerablemente. Ante a prohibición do contacto, xurdiu a obrigación de reinventarse para seguir practicando deporte de xeito seguro”, relatan desde a Federación.
Con ese obxectivo, a Federación Galega de Loita e Deportes Asociados realizou durante o último trimestre deste ano “o maior investimento da súa historia en material alternativo: dummies, para regalar aos Clubs, e poñer en marcha este novo formato de competición sen contacto.
A multinacional SUPLES LTD. financia parte desta iniciativa, poñendo de manifesto a súa adaptación a esta nova situación para os deportes de combate”.
A loita galega situouse como pioneira a nivel estatal á hora de poñer en marcha este novo formato de competición sen contacto. “Tratamos de mostrar actividades alternativas que poidan copiar o resto das comunidades. Con todo, as limitacións son moi diferentes dependendo de cada autonomía”, sinalan desde a Federación Galega de Loita e Deportes Asociados.
FEGALOITA reparte dummies e puntos hixénicos entre os clubs galegos
