As xogadoras da Escola Rosalía de Vigo acadan o subcampionato na Copa Iberdrola de Clubs 2025 de bádmintón na que as outras representantes galegas, o CB Athlos Ourense alcanzaron os cuartos de final, polo que a participación galega nesta competición estatal pode cualificarse de exitosa.
A cidade de Toledo acolleu, os días 13 e 14 de setembro de 2025, a oitava edición da Copa Iberdrola de Clubs Femininos, unha das competicións máis destacados do bádminton estatal. “A representación galega estivo a cargo do CB Athlos de Ourense e do Escola Rosalía de Vigo, que deixaron unha pegada imborrable na competición”, segundo informa a Federación Galega de Bádminton. A competición desenvolveuse no Pabellón Escuela de Gimnasia (Patronato Deportivo Municipal) de Toledo.
Subcampionato histórico para o Escola Rosalía
No caso do conxunto do Escola Rosalía o conxunto vigués fixo historia ao alcanzar a final do torneo, onde se enfrontaron ao Club Bádminton Oviedo, que se proclamou campión tras vencer 3-0. A pesar da derrota, as xogadoras do Escola Rosalía demostraron un nivel excepcional, destacando en cada partido e deixando claro que o bádminton galego está en plena ascensión. Regresan a Galicia co subcampionato no peto.
Para o CB Athlos Ourense a participación tamén foi exitosa dado que o conxunto da Cidade das Burgas alcanzou os cuartos de final da Copa Iberdrola de Clubs 2025. As galegas tamén se enfrontaron ao propio Club Bádminton Oviedo (finalmente campión). “Aínda que o equipo ourensán non puido superar a barreira das ovetenses, a súa actuación foi encomiable, deixando constancia do seu crecemento e potencial no panorama estatal”, apuntan desde a Federación Galega de Bádminton.
“Ambos os equipos fixeron gala de compañeirismo, entrega e loita en cada partido, representando con orgullo a Galicia no máis alto nivel do bádminton español. A Copa Iberdrola foi un escaparate do talento galego no bádminton, tanto o Escola Rosalía de Vigo como o CB Athlos Ourense demostraron que Galicia ten moito que ofrecer neste deporte, e que o seu futuro é prometedor”, aseguran desde a Federación Galega de Bádminton (FGB). A FGB fixo pública nas súas redes a “noraboa a ambos os dous equipos por representar a nosa terra con tanto orgullo e dedicación”.
