- A oitava xornada da Primeira Iberdrola de Fútbol Sala acaba sen ningunha vitoria para os cadros galegos.
Despois dun pleno de triunfos na xornada anterior, esta vez, os catro representantes da máxima categoría, resígnanse con dous empates e dúas derrotas.
O Poio Pescamar só acada un desaborido 2-2 ante o STV Roldán, mesmo resultado ca o CD Burela FS, que se medía ao Les Corts UBAE (2-2). A peor parte foi para o Ourense Ontime, que sufriu un durísimo revés fronte ao Melilla CD Torreblanca (6-0) e para o FSF Castro Bloques Cando, que caeu ante o Arriva AD Alcorcón (4-3).
Récord de partidos invictas nun inicio de liga para o Poio
O Poio Pescamar só logrou o empate fronte a un STV Roldán (2-2) que non parecía disposto a poñerlle as cousas fáciles.
No lado positivo, as poienses, adestradas por Luis López Tulla, non coñecen a derrota no que vai de competición, e bateron o seu récord de partidos invictas nun inicio ligueiro. Suman xa un total de 5 partidos gañados e 3 empates, o que reforza a súa condición de aspirantes ao titulo de liga.
Neste momento, o conxunto galego acumula 18 puntos, o que as sitúa no segundo lugar da táboa, só dous puntos por debaixo do Melilla CD Torreblanca, que lidera a competición con 22.
Ver esta publicación en Instagram
O seu próximo partido será contra o Arriva AD Alcorcón, o vindeiro día 1 de novembro ás 18:00 h.
FSF Castro Bloques Cando cae ante o Arriva AD Alcorcón (4-3)
Non era un partido sinxelo para o Castro Bloques Cando, que se enfrontaba, e perdía (4-3), a un rival da parte alta da táboa, o Arriva AD Alcorcón. As galegas, dirixidas este curso por Julio Delgado, non foron capaces de remontar un partido que se lles presentaba difícil, e tiveron que aceptar a súa segunda derrota no que vai de tempada.
Pese a isto, ocupan unha destacable 5ª posición na clasificación, acumulando xa 12 puntos e tan só 3 do STV Roldán, que se mantén no cuarto posto.
Ver esta publicación en Instagram
Mediranse agora ao Melilla CD Torreblanca, o próximo día 1 de novembro ás 19:30 h.
Xornada negra para o Ourense Ontime contra o líder da categoría
O Ourense Ontime sufriu un novo revés o pasado sábado 25 de outubro en campo rival. As galegas medíanse ao líder da competición, o Melilla CD Torreblanca, nun partido que acabou con 6 goles en contra para as ourensanas e 0 tantos a favor. Un revés máis que se suma a un complicado inicio de tempada, e que leva ao conxunto dirixido por Carlos Navarro a unha amarga 12ª posición.
Ver esta publicación en Instagram
Agora tratarán de darlle a volta a unha situación que se torna cada vez máis complexa. Esta vez terán a oportunidade contra outro oso, o Futsi Atlético Navalcarnero, será o vindeiro día 1 de novembro ás 11:00 h.
O CD Burela Fútbol Sala resiste en Vista Alegre
Primeira parte parte moi competida, con moi bo arranque do conxunto catalán, que anota no primeiro minuto e segunda parte con final de infarto no que as burelás logran empatar o partido, tirando de épica, no últimos seis minutos. Dobrete en ambos equipos por parte de Martita e Sydorenko.
Comeza costa abaixo o partido para as burelás, cun gol de Martita que remata, no corazón da área, un envío dende a ala dereita de Laura Torres. Continúa o partido con ocasións, en maior medida, para o equipo visitante, pero mantendo o marcador ata o descanso. Apertan máis as laranxas para partir do minuto 10, xerando oportunidades e con moito protagonismo de Lara, non logrando empatar o encontro.
Segunda parte máis igualada, cunha primeira ocasión clara de Lles Corts, no minuto 23, un disparo escorado que despexa Ana Eliza coas mans por riba da portería e recóllea Muni nunha contra de Sydorenko segundos despois. Presiona máis o conxunto catalán nesta segunda parte e chega o 0-2 no minuto 30, o segundo tanto de Martita tras unha recuperación e contraataque de Ona en propia cancha, que dispara desde a banda atopándose a Cris Branco, pero volve recoller Ona e combina coa xogadora rioxana que remata desde a área.
Aposta Belén Feal polo xogo de cinco e sae Lara coa elástica de porteira-xogadora no minuto 33 e un minuto despois, tras unha recuperación de Gabi a media pista, Sydorenko logra o 1-2 rematando de cabeza un disparo ao segundo pau de Cris Blanco.
Volve o Burela a saír de 5, esta vez con Irene de porteira xogadora e ocasión clarísima de Lara no 36, á que se lle escapa un remate na área tras un moi bo pase de Sandra nunha boa combinación no ataque de 5. Continúan tentándoo as burelenses e noutra boa estratexia dispara demasiado escorado Laura Barranco, atopándose á porteira.
Segundos despois, a xogadora almeriense case a volve a meter entre paus nun remate que lle rouba Peña sacándoa a córner. E chega o empate no 38, o segundo de Sydorenko, en pleno xogo de 5 para 4, sorprendendo a Muni cun potentísimo disparo desde os 13 metros. Sae Les Corts con Peña de porteira-xogadora tentando volver poñerse por diante de novo no marcador, sen conseguilo.
Últimos segundos de infarto en Vista Alegre e tena Lara no últmo segundo tras un despexe de Ana Eliza directo a portería, onde Lara tenta metela de cabeza pero choca con Muni que non permite á focense anotar o terceiro, xusto antes da bucina final.
O cadro burelense sitúase na 15ª posición da táboa, un escenario que se torna escuro para as galegas, pero que aínda se pode revertir nos vindeiros encontros de liga.
O próximo partido será o próximo día 2 de novembro, contra o AE Penya Esplugues ás 12:00 h.
O partido estivo adicado á campaña “NON á violencia de xénero” do Deporte Galego.
FICHA TÉCNICA
2) CD BURELA FS: Ana Eliza; Cris Blanco, Irene, Sandra, Lara -quinteto inicial-, Gabi, Sydorenko, Laura Barranco, Marina.
2) AE LES CORTS UBAE: Ángela; Laura Torres, Silvia, Martita, Peña –quinteto inicial-, Paula Guix, Bet, Rojo, Luci, Ona, Laura Oliva, Muni. EQUIPO ARBITRAL: Borja Darriba, Daniel López e Andrea de Luis.
INCIDENCIAS: Partido correspondente á oitava xornada da Primeira Iberdrola Fútbol Sala
Consulta a clasificación da Primeira División Iberdrola de fútbol sala na RFEF
