A tempada remataba en casa para o Ourense Envialia, sen nada en xogo ao competir no grupo polo título, ao non ter opcións de colarse no play-off final. As galegas recibiron en casa ao Torreblanca Melilla coa única meta de despedir o ano cunha vitoria. E, como dícia hai uns días o técnico, ser “xuíces nesta competición”, e garantir que a competición non perdía nivel até o minuto final por parte das ourensás. E o obxectivo está conseguido. As de Morenín venceron por un 2-0 ao seu rival desta xornada final.
Malia o resultado máis abultado para as locais, o encontro disputouse con poucas ocasións a ambos lados da cancha. O Envialia loitaba por despedir a tempada cunha alegría para a súa afección e así o demostrou na pista. O Torreblanca, pola súa banda, chegaba á cita tamén sen nada en xogo, conscientes de non ter posibilidades de colarse na fase final.
O Envialia marcou o ritmo do partido
O encontro comezou cun tempraneiro gol de Chiky para as ourensás, anotando no terceiro minuto de partido. No bando contrario, o Torreblanca competía sen moito acerto fronte a portería galega.
Co paso dos minutos o marcador permanecía inamovible e o primeiro tempo rematou sen máis goles. As de Morenín seguiron liderando o partido e rondando o segundo tanto con disparos despexados por Patri na meta contraria.
Despois do paso por vestiarios o Torreblanca puxo unha marcha máis intentando rascar algún punto na súa visita a Ourense, con varias ocasións de Fernanda. O equipo visitante comezaba a coller o mando do partido, pero sen o acerto que acompañou ao Envialia na primeira metade.
O conxunto local optou por unha estratexia ao contraataque, sen arriscar moito nas súas accións. A falta de seis minutos para o pitido final, as melillenses cambiaron a un xogo de cinco, pero Vane mantiña a portería do Envialia a ceros.
De feito, nestes derradeiros minutos, a gardameta ourensá converteuse na protagonista, parando tentativas de ataque contrarias e anotando o segundo gol das galegas desde campo propio. O tramo final non mudou o guion, e os tres puntos da vitoria quedaron nos Remedios.
FICHA TÉCNICA
OURENSE ENVIALIA: Vane; Chiky, Jenny Lores, Laura Uña e Judith -cinco inicial-. Tamén xogaron, Moraima, María, Iria Saeta e Susana.
TORREBLANCA MELILLA: Patri; Fernanda, Bía, Julia e Lydia -cinco inicial-. Tamén xogaron, Desi, Fabi, Mirallés, Lubna e Jacke.
GOLES: 1-0, min. 3 Chiky; 2-0, min. 35 Vane.
ARBITRAXE: Montero Galán e Ontañón Ramos do colexio de Castela e León. Recibiron cartón amarelo Bía, Marcio Santos, Lydia e Sara Santos no Torreblanca e Judith, Susana e Iria Saeta no cadro do Ourense Envialia.
INCIDENCIAS: Partido correspondente á oitava xornada da segunda fase da Primera División do fútbol sala feminino da RFEF, disputado no pavillón dos Remedios de Ourense.
