A segunda fase competitiva, na que o Ourense Envialia está enmarcado no grupo polo título de campión, non está comezando ben para as ourensás. Despois de dúas xornadas, as de Morenín aínda non coñecen a vitoria, algo que intentarán cambiar este sábado 10, ás 17:00 horas, contra a AD Alcorcón.
O encontro celebrarase no pavillón de Os Remedios, no que as colistas, o Envialia, actuarán como locais. Actualmente, as ourensás acumulan 26 puntos e un coeficiente do 1,444, o que as sitúa na derradeira posición.
Non se sitúa moito mellor o seu rival desta fin de semana. A AD Alcorcón é penúltima, con 33 puntos e un coeficiente do 1,833. Así, ambos están lonxe da loita por entrar nos catro primeiros postos, co Torreblanca Melilla como barreira cun coeficiente de 2,111 puntos.
As derrotas preceden o encontro entre Envialia e Alcorcón
Esta está a ser unha tempada moi irregular para as de Morenín, que lograron clasificarse para o grupo polo título entrando na última posición do Grupo A, quedando cuartas, e están a sufrir múltiples lesións.
A última delas foi a de Marta Figueiredo, unha peza clave no xogo ourensán, que non poderá voltar ás pistas neste curso. A futbolista será intervida este mesmo venres.
Este é un dos factores que explican o mal inicio da segunda fase das ourensás, que na primeira xornada caeron ante o Burela, por un 1-4, e na semana seguinte contra o Móstoles cun 6-3.
Porén, o Alcorcón tamén chega en mal momento, despois de perder cun contundente 1-6 ante o Futsi Atlético, un dos favoritos da competición.
Como contrapunto, o conxunto madrileño conta nas súas filas coa ourensá Vane Sotelo, habitual nas convocatorias da Selección e cuarta mellor futbolista a nivel mundial segundo os FutsalPlanet Awards 2020. Actualmente a galega é a terceira máxima anotadora da categoría, con 19 goles. Vane Sotelo chegou a xogar no Ourense Envialia no pasado, polo que será un partido especial para a futbolista.
