Hoxe tocoulle o turno a Sara Alonso. A defensora do Viajes Interrías comezou a súa andaina no mundo de fútbol hai tan só tres anos pero nesta primeira tempada no como xogadora do conxunto de Villalonga está a demostrar a súa valía e a facerse un oco na Primeira División Nacional.
A 14 do Inter recoñeceu o gran ambiete que predomina no vestiario cun grupo de xogadoras “moi loitadoras e con ganas de lograr obxectivos”. Ademais, destacou o seu xogo aéreo e a labor defensiva como os seus puntos fortes dentro do terreo de xogo.
Pregunta: Por que empezaches a xogar a fútbol e cando?
Resposta: Pois a verdade é que sempre tiven a espinita de querer probar, no recreo do cole xogaba moitas veces, pero nunca me animei a xogar nun equipo. Cando deixei baloncesto, hai 3 anos, unha amiga animoume a probar en fútbol, no equipo de Mos, e ao final collinlle o gustillo.
P: É a túa primeira tempada no Viaxes InterRías. Que foi o que che animou a fichar polo conxunto de Villalonga?
R: Animoume moito o grupo que hai, de xogadoras moi loitadoras e con ganas de lograr obxectivos. Ademais, considerei que xogar en Liga Nacional era unha gran oportunidade para mellorar como xogadora.
P: Que tal foi a túa adaptación ao equipo?
R: Xenial, sentinme cómoda desde o principio coas miñas compañeiras, a confianza foi aumentando e as ganas de compartir equipo con elas aínda máis.
P: Brevemente, dous puntos fortes e dúas cousas a mellorar como xogadora.
R: Como puntos fortes, o xogo aéreo e a labor defensivo. Como puntos a mellorar, a capacidade de atención (se mo explicas tres veces mellor que una) e a lectura de xogo.
P: Como estás a vivir estes días de corentena, con ganas de volver?
R: Dentro do que cabe bastante ben, se o tempo acompaña intento sair ao xardín para xogar á pelota. Sempre está ben ter con quen xogar, así que con moitas ganas de volver estar coas miñas compañeiras no campo.
