O Durán Maquinaria Ensino prepara xa a parte final da tempada, despois dun parón de dúas semanas. A súa volta a pista e inicio deste complicado tramo competitivo será ante o Embutidos Pajariel Bembibre, este xoves, 11 de febreiro, ás 18:00 horas.
O rival desta xornada ocupa actualmente a penúltima posición da Liga Feminina Endesa, pero non por iso as lucenses deben subestimalo. Xa o advirte o adestrador galego, Carlos Cantero: “Todos os equipos que loitan por saír da parte baixa da clasificación ao final son moi perigosos”.
Especialmente no caso do Bembibre, un conxunto que “leva varias tempadas acostumado a facer este tipo de partidos”. Ademais, Cantero sinala outro dos seus puntos fortes: o seu quinteto titular. “Ten catro xogadoras de moita garantía, que asumen moito balón e son moi perigosas. Cando están as catro en pista, que é a maior parte do tempo, son moi perigosas. Reforzáronse ben e reforzaron ese quinteto inicial”, apunta o técnico.
Algunha destas estrelas do equipo berciano son Aisha Higgs, cuarta máxima anotadora con 16 puntos de media por partido, ou Roselis Silva, entre as mellor valoradas cun crédito total de 187 puntos.
O parón foi positivo para o Ensino
No bando do Durán Maquinaria Ensino de Lugo andan cortas de efectivos, pero con confianza no seu plantel. Ademais, a recente pausa serviu para que algunhas xogadoras tocadas se recuperaran e volvan a estar en plena forma para competir.
Así, Carlos Cantero poderá contar con todas as baloncestistas agás Natalie van den Adel. A holandesa foi convocada coa súa selección e tivo problemas para volver a España debido á climatoloxía. Unha vez en terras galegas soubo que o seu equipo nacional detectou un caso positivo en COVID-19, polo que non se reincorporará ás sesións de traballo lucenses ata ter un restultado negativo nas probas correspondentes.
Helena Oma xa está aportando
Unha das novidades para este tramo final nas filas lucenses é a incorporación de Helena Oma. A catalá aproveitou o parón para habituarse ás dinámicas de traballo do Durán Maquinaria Ensino e, tal e como confirma o seu adestrador, o está logrando con moito éxito.
“Oma é unha xogadora intelixente, estase adaptando ben, está aprendendo rápido os sistemas e todo iso o fai cunha progresión máis rápida que as anteriores exteriores que estiveron na súa pel. Da unha calidade de adestramento moito máis alta”, sinala Cantero.
Pero o que máis destaca da xogadora é a súa habilidade para formar parte do grupo, “un dos nosos puntos fortes, o bo roio, o priorizar o xogo colectivo ao individual. En todo iso aporta bastante e nótase a nivel dos adestramentos e espero que se note nos partidos”, engade.
Carlos Cantero: “Oma é unha xogadora intelixente, estase adaptando ben, está aprendendo rápido os sistemas e todo iso o fai cunha progresión máis rápida que as anteriores exteriores que estiveron na súa pel. Da unha calidade de adestramento máis alta”
Como é costume, o partido do Durán Maquinaria Ensino e o Bembibre poderá seguirse vía straming a través do Canal FEB.
Carlos Cantero: “Imos entrar nunha parte moito máis difícil da tempada”
