Coa primeira fase da Liga Feminina Endesa xa rematada, o Durán Maquinaria Ensino pode centrarase completamente nos play offs, nos que terán ao rival desexado: o Valencia Basket.
As lucense remataron a primeira parte cunha vitoria ante o Quesos El Pastor, polo que quedan na sétima posición con 15 vitorias e 15 derrotas, sumando 45 puntos. O seu rival no primeiro duelo de loita polo título serán as taronjas do Valencia, que quedan segundas, con 59 puntos e só unha derrota, empatando coas líderes e sendo o equipo en mellor racha (17 vitorias consecutivas).
Unha destas vitorias xestouse ante o propio Ensino, na recuperación da 23ª xornada, nun partido marcado pola arbitraxe segundo Carlos Cantero. O técnico do club galego mostrouse orgulloso do traballo das súas, pero asegurou que as decisións arbitrais non permitiron que competisen como saben. Por iso, en Lugo hai sede de desquite.
Así é o calendario da segunda fase da LF Endesa para o Ensino
Cos resultados desta tempada, o Durán Maquinaria Ensino volve ás eliminatorias polo título 17 anos despois. A súa oportunidade de coroarse campioas pasa por un formato de cuartos e semifinais de ida e volta, co segundo partido na cancha do mellor clasificado.
A final contará, como é costume, co tradicional play-off a tres partidos, coa vantaxe de campo para o equipo mellor clasificado na liga regular.
Cos cuartos de final como primeiro paso para as lucenses, o rival será o ansiado Valencia, que acturará como local na ida, prevista para o 31 de marzo ou 1 de abril e a volta, en Lugo, será na fin de semana do 3 de abril.
