O Durán Maquinaria Ensino ven dunha moi boa dinámica de xogo, con tres vitorias consecutivas e cun gran entendemento das xogadoras tanto dentro como fóra da pista, o que se reflicte nos resultados. Agora un parón avecínase na Liga Feminina Endesa, pero no conxunto lucense venlle unha parte positiva.
Ao non poder xogar co Valencia BC este xoves, 28 de xaneiro, (desgraciadamente hai positivos por COVID-19 no conxunto valenciá), as lucenses non retomarán a competición regular ata o 11 de febreiro.
Ata entón, as tarefas que teñen por diante as de Carlos Cantero son claras: acelerar a adaptación da nova xogadora do Ensino, Helena Oma, e a recuperación das deportistas tocadas que ten agora o plantel galego.
O Ensino seguirá traballando para manter a boa dinámica
O último partido gañado, ante o Ciudad de La Laguna, é vital no obxectivo de disputar os play offs. Os dous puntos do trunfo non serviron para superar ás canarias na clasificación, xa que estas ostentan o basket average a favor.
Neste sentido, nos minutos finais do partido “tiñamos dúbidas sobre se pedir un tempo morto para comentársello ás xogadoras, pero ao mellor por arriscar iso dábamoslle ao rival ataques rápidos e fluídos”, explica Carlos Cantero. Por iso, priorizaron a vitoria, sabendo que “gañar en Canarias non é fácil”.
Despois de vencer neste partido, como ven sendo costume esta tempada nos duelos que requiren gran esforzo físico, “sempre vai caendo algunha xogadora”. É habitual que o ritmo de competición repercuta no estado do plantel, e agora Natalie Van den Adel e Merritt Hempe acumulan molestias que lles impiden adestrar con normalidade. “Non son cousas graves, pero son cousas de cada día e haberá que estar atentos á evolución das xogadoras”, sinala o seu adestrador.
Agora, co adiamento do partido ante o Valencia BC (por aplicación do protocolo de prevención da transmisión da COVID-19 ao detectarse positivos), o Ensino terá un par de semanas sen competir. Un parón que desde o punto de vista do técnico será positivo, xa que servirá para recuperar ás xogadoras tocadas e para que Helena Oma “gañe minutos nos adestramentos e vaia amoldándose”.
Helena Oma: “O parón ven ben para poder coñecer ás compañeiras, saber como xogan leva o seu tempo. Pero tamén para descansar, recargar as pilas e recuperar ás compañeiras tocadas”
Algo co que coincide a xogadora, que acaba de incorporarse á disciplina do Durán Maquinaria Ensino e chega con ganas de aportar e reencontrarse co seu xogo sobre a pista. “O parón ven ben para poder coñecer ás compañeiras, saber como xogan leva o seu tempo. Pero tamén para descansar, recargar as pilas e recuperar ás compañeiras tocadas”, declaraba na súa presentación a propia Helena Oma.
Cómoda posición na táboa para o Ensino
Actualmente, as lucenses do Durán Maquinaria Ensino CB levan once vitorias e once derrotas, no mesmo punto no que estaban a tempada pasada, unha posición “cómoda”. “Sabemos que nesta primeira parte da segunda volta xogamos con case todos os equipos de arriba, como pasaba na ida. Por un lado é perigoso, porque cando xoguemos cos de abaixo estarán pelexando por non descender e se converten en rivais que van a morte e teñen que gañar si o si”, recorda o técnico das galegas.
Pero Carlos Cantero móstrase tranquilo. Sinala que no punto no que se atopan, “se perdes fas borrón e conta nova e segues, e se gañas, valen moito, porque son contra rivais directos e méteste en situación de play offs“.
Unha fase da tempada na que Helena Oma, a fichaxe do Ensino esta semana, estará lista para aportar. “Teño moitas ganas de traballar co equipo, coñecer ás compañeiras e comezar a xogar”, afirma a deportista que na súa presentación dicía estar “moi agradecida e, sobre todo, moi ilusionada” coa súa incorporación á disciplina do club lucense.
Helena Oma: “Estou moi agradecida e, sobre todo, moi ilusionada”
