O Durán Maquinaria Ensino segue dando pasos para lograr o obxectivos de xogar os play offs. Despois de vencer a SPAR Gran Canaria e Casademont Zaragoza, a seguinte vítima das lucenses foi o Ciudad de La Laguna Tenerife. Unha vitoria que vale dobre, ao ser contra un rival directo (63-72).
O que non lograron as pupilas de Carlos Cantero foi levarse o basket average. Na ida, as xogadoras do Ensino perderon por 13 puntos e na volta gañaron por 9, dándolle case a volta ao resultado da primeira volta. De todas formas, esta terceira vitoria consecutiva mantén altos os ánimos en Lugo, nun equipo que afronta con enerxía o que resta de tempada.
O Ensino soubo ler o partido
Xa na previa, Carlos Cantero avisaba de que o seu plantel intentaría aproveitar o cansancio acumulado das canarias, que viñan de xogar a competición europea, pero á vez recoñecía que sería un partido moi físico e duro. Unhas predicións que se cumpriron e das que o Ensino soubo sacar partido.
Os primeiros puntos do partido foron para as locais, pero as galegas enseguida atoparon a forma de facerse co control do partido e sacar vantaxe dos erros das canarias. Cun xogo coral coordinado, as lucenses estaban fortes en defensa e tiñan acerto en ataque. Así, a catro minutos do final do primeiro cuarto, o Ensino situábase por riba.
Os cambios no banco rival non serviron para quitarlle a batuta do xogo ás galegas, que seguiron aumentando a distancia no marcador ata levarse o primeiro tempo por unha diferenza de cinco puntos.
Para o seguinte parcial, a tónica do encontro era similar. O Ciudad de La Laguna apretaba na presión con Fasoula e as visitantes non conseguían vencer á zona rival. Pero dous triples de Bea Sánchez e de Stanacev disiparon as dúbidas do Durán Maquinaria Ensino. As galegas non soltaban a súa vantaxe e chegaron ao tempo de descanso levándose o duelo por sete puntos.
As canastras entraron mellor logo do descanso
Despois do paso por vestiarios as canarias reaccionaron e subiron o nivel do partido. A pausa sentoulle ben ás locais que saíron á pista con ganas de dar un golpe na mesa. As canastras entraban máis facilmente para Ciudad La Laguna mentres que o Ensino defendía como podía a súa superioridade no electrónico.
As locais recortaban distancias co acerto de Raksanyi, que asinaba dous triples consecutivos na metade do cuarto. Unha acción que non quedou sen resposta. Stanacev e Gimeno mantiveron ao seu equipo por diante grazas a varios tiros acertados, deixando o marcador 43-47 a case tres minutos do cuarto final.
As galegas mantíñanse serias en defensa e aseguraban os ataques, o que impediu que as contrincantes dominasen o partido. O pulso cada vez estaba máis igualado e, a falta de dez minutos, o Ensino só vencía dun punto.
No último tempo o duelo estaba completamente aberto. As lucenses seguían loitando cada balón e aseguraban pouco a pouco a vitoria. Os primeiros puntos das galegas tiñan contestación nos ataques locais, pero un triple de Gimeno e unha canastra de Stanacev abrían unha brecha no electrónico situando ao Ensino oito puntos por riba.
As visitantes non soltaron xa a vantaxe lograda. A falta de catro minutos, o banco do Ciudad La Laguna solicitou un tempo morto, ao verse incapaz de controlar ás galegas. Cun triple nos minutos seguintes, a vitoria do Ensino peligraba tras máis de dous minutos sen anotar.
Entón, Hempe interviu para devolverlle o ritmo ás xogadoras de Cantero, que volveron achegarse á canastra con acerto. No minuto final o partido parecía xa decidido, e finalmente as lucenses venceron por nove puntos nun duelo vital para estar na loita polos play offs.
Agora, ambos equipos empatan a puntos (33) na clasificación da categoría de ouro, onde ocupan a quinta posición as canarias e a sexta as galegas, con once vitorias e once derrotas cada un.
Gimeno, MVP da FEB e da afección
As molestias que impediron a Vega Gimeno xogar o anterior partido non impediron que brillara nesta xornada. A alero foi elixida MVP pola afección do Ensino e tamén foi a mellor valorada do encontro, con 16 créditos de valoración.
Gimeno foi clave no xogo lucense, logrando asinar 17 puntos e catro rebotes, ademais de realizar dúas asistencias. Seguirona de preto Hempe, Stanacev e White, as tres con 14 puntos de valoración.
⚡️⚡️MVP ⚡️⚡️
V E G A
G I M E N O⭐️ 17 Puntos. 4 Rebotes. 2 Faltas recibidas y una lección bajo los aros. #SomosEnsino #LFEndesa #VoltaráLoita pic.twitter.com/iyaUmPlcqn
— Ensino Lugo (@EnsinoLugoCB) January 24, 2021
Podes revivir o partido, que se retransmitiu vía streaming, nesta ligazón.
FICHA TÉCNICA
63) CIUDAD DE LA LAGUNA TENERIFE: Raksanyi (18), Bettencourt (8), Kostourkova (4), Atkinson (10) e Taylor (12) — quinteto titular —. Tamén xogaron: Montenegro (-), Fasoula (8), Herrera (-), Nauwelaers (-), Abdi (2) e Ocete (1).
72) DURÁN MAQUINARIA ENSINO: Hempe (14), Van Den Adel (6), Stanacev (12), Gimeno (17) e Prieto (4) — quinteto titular —. Tamén xogaron: Aliaga (3), Sánchez (6), White (10) e Blanco (-).
PARCIAIS: 16-21, 13-15, 19-13 e 15-23
ÁRBITROS: Ángel Lucas de Lucas, Jorge Baena e Elena Espiau.
INCIDENCIAS: Partido correspondente á xornada 22 da Liga Femenina Endesa disputado no pavillón de deportes Santiago Martín en San Cristóbal de La Laguna (Santa Cruz de Tenerife).
