Tres puntos separan a Durán Maquinaria Ensino e Movistar Estudiantes na Liga Feminina Endesa. As lucenses ocupan a oitava posición da táboa, tras a derrota ante o líder o pasado sábado, mentres que as madrileñas ocupan a quinta. Ambos conxuntos enfrontaránse o martes, 22 de decembro, ás 19:15 horas, no Pazo dos Deportes de Lugo.
“Os duelos no Pazo sempre son importantes. Gañar en casa é fundamental e este ano está costando un pouco máis pola falta de xente”, apuntaba o técnico lucense, Carlos Cantero.
Malia o partido perdido ante o Perfumerías Avenida, as xogadoras de Cantero, chegan a este duelo con boas sensacións, sobre todo tras ter acadado un posto na Copa da Raíña.
As xogadoras do Ensino suman xa sete vitorias fronte a nove derrotas, con máis de mil tantos anotados a favor e acadando 23 puntos na táboa clasificatoria.
Pola súa parte, o Movistar Estudiantes chega dunha derrota ante o Spar Girona, un dos conxuntos máis fortes da Liga Feminina Endesa. Despois de disputar 16 partidos, as madrileñas chegan con 10 vitorias e seis derrotas, que as sitúan na quinta posición con 26 puntos.
Un posto moi salientable tendo en conta que este curso é o seu estreo na categoría, tras proclamarse gañadoras da Liga Feminina 2 a tempada pasada.
Entre as súas filas está Jana Georges Raman, segunda xogadora mellor valorada do anterior partido e unha das máxima anotadoras da competición. Tamén estará Atonye Nyngida e Leslie Knight, dúas baloncestistas que suman máis de 200 puntos de valoración no que vai de tempada.
As exteriores, punto débil do Ensino
Para levarse este encontro ante un rival da súa categoría, Carlos Cantero deberá corrixir os erros do xogo exterior, unha área na que as lucenses deben mellorar de cara a segunda volta competitiva.
No encontro contra o Perfumerías Avenida o acerto desde esta zona foi moi escaso, e en anteriores partidos esta foi unha posición na que tamén houbo erros en defensa.
Outro dos puntos nos que deben mellorar é nos rebotes. As lucenses son o segundo equipo que menos rebotes consegue de media da categoría, só por diante do Embutidos Pajariel Bembibre, penúltimos na clasificación.
As claves para frear ao Movistas Estudiantes
Este será o estreo da segunda volta en casa para as de Lugo, nun partido no que intentarán corrixir os erros que as levaron á derrota ante o Movistar Estudiantes na primeira metade da competición.
Cantero recorda aquel duelo como “unha segunda xornada despois dunha pretempada moi atípica. Daba a sensación de que seguiamos de pretempada, tanto nós como elas. Foi un partido un pouco raro”. As galegas perderon 83-71 ante un recentemente ascendido que está dando a sorpresa na categoría.
“É un equipo que demostrou que é máis duro do que todo o mundo a priori agardaba. Gúistalle xogar cun quinteto moi alto, é no que calquera xogadora é capaz de tirar de tres e de xerar un 1 contra 1″, declara o técnico.
En definitiva, un conxunto que pode xerar perigo por todos lados. “Tanto as pequenas, como Meli Gretter, poden atacar desde tiro desde o un contra un, e as postes como Da Silva ou Raman poden tirar de tres”, analiza.
As claves para loitar pola vitoria pasarán por “evitar que xogen dinámico, que corran e evitar situacións de rebote ofensivo e segundas oportunidades. Logo a partir de aí, corrixir erros, ter máis acerto e atopar situacións que nos den vantaxe”, sinala o adestrador.
Preguntado polos reforzos nos planteis do resto de equipos da categoría, Cantero explica que é algo normal no mercado de inverno e que “todos os equipos se reforzaron bastante, sobre todo os que están na nosa zona baixa da táboa”.
Mirando ao seu propio club, o técnico aventura que non recibirán xogadoras novas, aínda que “si faría falta unha fichaxe. Xa costou moito traer a Nina e non preveo ningunha fichaxe, pero non significa que non faga falta para afrontar a segunda volta mellor e poder estar en play offs e afrontar a Copa mellor”.
La cuesta de Enero se adelanta para @EnsinoLugoCB tras Avenida llega Estudiantes.
El martes 22 a las 19:15 nos mediremos a uno de los equipos revelación de la temporada. #SomosEnsino #LFEndesa #VoltaráLoita pic.twitter.com/kx3iJ9o0hm
— Ensino Lugo (@EnsinoLugoCB) December 20, 2020