Antes do parón polo Preolímpico de China, onde estará a galega Tamara Abalde, o Durán Maquinaria Ensino viaxa na xornada 19 da Liga Endesa a Vitoria. O seu rival será o equipo da ourensá Raquel Carrera, o RPK Araski no Polideportivo Mendizorrotza o venres (31 de xaneiro, ás 19.30 horas).
O conxunto lucense está no seu mellor momento da tempada. Levan tres vitorias seguidas —a primeira ante Quesos El Pastor, a segunda ante o líder de inverno, o Spar Citylift Girona e a última, ante o IDK Gipúzkoa— e na táboa suman o mesmo número de encontros gañados que de perdidos, nove. Agora mesmo, son sextas por detrás do seu rival de esta semana. Só as diferencian dous puntos (29 fronte a 27).
“Partido complicado que xogamos fóra da casa. Ademais Araski está tamén coma nós nunha dinámica positiva e é un equipo con todas as letras. Poñen moitas dificultades, variantes tácticas con xogadoras que calqueira aporta”, comentou o adestrador do Ensino en rolda de prensa, Carlos Cantero.
Na xornada 6 da máxima competición de baloncesto xa se enfrontaron ambos equipos. As de Lugo perderon por tan só 4 puntos de diferenza no Pazo Provincial dos Deportes (68-72). A máxima anotadora das rivais foi Maria del Carmen Asurmendi con 15 puntos. A galega do plantel vasco, Raquel Carrera fixo un total de 7. Por parte das nosas xogadoras, Laura Aliaga estivo moi acertada no tiro da liña de 6,75 metros, facendo un 3 de 3 e Aleksandra Stanacev con 4 de 8. Sumaron 31 (15 e 16 puntos).
Raquel Carrera acumulou tres tempadas de experiencia na Liga Feminina 2 da man do Celta Zorka Recalvi cun promedio na última de 12’3 puntos, 6’5 rebotes e un 17’6 de valoración. Deu o salto á máxima categoría con tan só 18 anos da manda do Valencia Basket, compartindo vestiario con Tamara Abalde. O ano pasado, polo verán, o equipo vasco fichouna para o seu novo proxecto na Endesa.
“Son moi parecidas a nós, quizais están un escalón por riba pero estamos loitando para intentar alcanzalas. Realmente como está a Liga non podemos asegurar que é superior e quen non. A priori, son favoritas polo tema de xogar na casa“, dixo Cantero sobre a cita.
Unha semana máis, Nyingifa, do Ensino, volve a repetir no quinteto inicial
Despois de volver a facer que a súa pista ruxira, a nixeriana Atonye Nyingifa repetiu o posto de estar entre as mellores da xornada. Esta vez obtivo un 24 de valoración polos 18 puntos e 13 rebotes que conseguiu ante o IDK Gipúzkoa. No ranking xeral é quinta con 278.
Pero os méritos para este equipo imparable non se quedan ahí. A primeira no total de asistencias por partido é a serbia Aleksandra Stanacev. Atópase por riba de Silva Domínguez, do Perfumerías Avenida, o rival na Raíña das de Lugo, e de Laia Palau, do Spar Citylift Girona. Stanacev suma un total de 96 pases en 18 partidos.
Pero non só son esforzos individuais, xa que todo o plantel fai o posible cada semana para intentar ser mellores como apunta o seu técnico: “Xuntouse a mellora no nivel de adestramentos co aumento da confianza e o bo ambiente que axudan a conexión de todo o grupo e grazas ás vitorias todo vai moito mellor”.
DATOS DE INTERESE
RPK ARASKI: María del Carmen asumendi, Izaskun García, Tania Pérez, Natalie Van del Adel, Shacobia Shaunte, Cristina Molinuevo, Laura Quevedo, Raquel Carrera, Laura Pardo e Tamara Camacho.
DURÁN MAQUINARIA ENSINO: Laura Aliaga, Ainhoa López, Atonye Nyingifa, Bea Sánchez, Brittany Dinkins, Kalis Loyd, Fiona O’Dwyer, Aleksandra Stanacev, Britany Miller e Shereesha Richards.
DÍA E HORA: 31 de xaneiro, ás 19.30 horas.
CAMPO: Polideportivo Mendizorrotza- Vitoria (Álava).
ÁRBITROS: Jesús Marcos Martínez Prada, Jorge Caamaño Muñoz e Victor Rafael González Banderas.
INCIDENCIAS: Partido correspondente a xornada 19 da Liga Endesa no que enfrontará ao RPK Araski contra o Durán Maquinaria Ensino no Polideportivo Mendizorrotza.
