Sábese que no deporte, como na vida, nada é como empeza, senon como remata. Pero a ninguén lle amarga empezar con bo pé que foi o que lle aconteceu ao Durán Maquinaria Ensino na súa estrea de pretempada. As lucenses recibían no Pazo dos Deportes de Lugo ao Embutidos Pajarial Bembibre ao que se impuxeron por un claro 79-57.
Con todo, e pese á diferencia final do marcador, o comezo non foi tan cómodo para as xogadoras que adestra Miguel Ángel Ortega. Ao final do primeiro cuarto perdían de tres. E ao descanso as pupilas de Pepe Vázquez aínda incrementaban nun punto máis a súa vantaxe (32-36).
Pero xa deciamos ao comezo que non é a cousa como comeza, se non como remata. A volta de vestiarios as instruccións de Miguel Ángel Ortega surtiron efecto e as galegas meteron a directa. No terceiro cuarto non houbo cor. Un parcial de 30-7 decantaba o partido para as lucenses.
Xa no último período, o Durán Maquinaria Ensino volvía a poñerse por diante do Bembibre, pero unicamente tres puntos (17-14. Ao final do partido, un triunfo por un tanteo de 79-57 que permite ás galegas empezar con bo pé apreparación deste curso 2021-22.
O punto negativo do partido foi a lesión de Helena López, que se suma a outras xogadoras que están tendo problemas físicos neste periodo de preparación de cara á competición.
Ao final do partido o técnico local, Miguel Ángel Ortega declaraba estar “contento pola actitude, o esforzo que fixo todo o mundo, eu iso valóroo moito. Agora, aos poucos, a ver se imos recuperando a estas catro xogadoras que temos fóra do equipo. Estar todas, mentalmente, é tamén outra cousa”.
Neste sentido, das ausencias, o adestrador do Durán Maquinaria Ensino confesaba que a pretempada estaba a ser “accidentada. Houbo xogadoras que non puideron adestrar por diferentes cuestións e iso para o ambiente do equipo… o traballo de cada día… reséntese. Pero suplímolo con moitas ganas e ilusión que transmite o equipo para facer ben as cousas”, matiza o técnico das galegas.
FICHA TÉCNICA
79) DURÁN MAQUINARIA ENSINO LUGO: Nathalie Van den Adel (18), Laura Aliaga (9), Georgina Bahí (8), Helena Oma (14) e Chatrice White (13) – quinteto inicial -. Tamén xogaron: Alessandra Orsili (11), Sofía da Silva (5) e Elena Lijó (1).
57)- EMBUTIDOS PAJARIEL BEMBIBRE: Anna Palma (10), Laura Méndez (6), Tina Jakovinna (2), Marianne Kalin (4) e Kadri-Ann Lass (17) – quinteto inicial -. Tamén xogaron: Helena López (11) e Ainhoa Lacorzana (7).
PARCIAIS: 13-16, 19-20, 30-7 e 17-14.
ÁRBITROS: J. Rial, I. Díaz e D. López. Non eliminaron a ningunha xogadora.
INCIDENCIAS: Partido disputado no Pazo dos Deportes de Lugo ante máis dun cento de seareiras. Debut na casa en pretempada do conxunto lucense
