O inicio da segunda volta comeza cunha derrota para o Durán Maquinaria Ensino, que non pilla por sorpresa nin ao club nin á afección. As lucenses enfrontábanse ás líderes invictas da Liga Feminina Endesa, o Perfumerías Avenida. Un rival que xa se prevía como moi complicado, e ante o que caeu o pasado sábado cun 80-45.
Carlos Cantero, adestrador do Ensino, xa adiantaba na previa que este curso “é practicamente imposible dar a sorpresa a un dos de arriba”, e así foi, o Perfumerías Avenida levouse a vitoria número 16 da campaña e as galegas volveron cunha derrota de Salamanca.
Con todo, o técnico recorda que o obxectivo deste encontro para o plantel lucense pasaba por “non xogar pensando no marcador, senón desfrutar do que tiñamos diante e facer un partido digno”. Unha meta conseguida.
O Ensino apenas tivo oportunidades
O primeiro cuarto xa foi unha mostra do que sería o resto do duelo, cun Perfumerías marcando o ritmo frenético do partido e case sen deixar opcións ao Ensino. Nos primeiros dez minutos, nos que xa comezou a brillar Tiffany Hayes do lado local, as salamantinas adiantábanse a pasos axigantados, cun resultado de 17-6 no luminoso para rematar o parcial.
No segundo tempo, as xogadoras de Cantero tiveron máis acerto na canastra, sobre todo da man de Vega Gimeno, quen acabaría sendo MVP do encontro. O traballo defensivo das visitantes logrou acada un resultado algo máis igualado no segundo cuarto, pero a diferenza seguía a ser considerable no descanso, marcando un 39-22.
Tras o paso por vestiarios, as de Salamanca demostraron porque aínda non atoparon un rival que as poida vencer, e seguiron dominando claramente un partido que estaba máis que decidido. O Ensino seguir traballando na defensa, pero sen acerto ante un rival superior. Desta forma, a falta de dez minutos para o final, o Perfumerías Avenida gañaba por 33 puntos, case duplicando a vantaxe da primeira parte.
O cuarto final serviu para sentenciar completamente o partido. Coa vitoria xa anunciada, as xogadoras dirixidas por Roberto Íñiguez, relaxáronse sobre a pista e baixaron a intensidade, logrando un resultado máis parexo no último cuarto. As lucenses estrean así a segunda volta cunha derrota, pero cun partido que o seu adestrador califica de “digno”.
A valoración de Cantero
“Fixemos un partido digno, non foi ningunha marabilla, nin tampouco viñemos aquí a perder. Pero estamos ante un rival ao que cada vez que conseguía un tiro o metía, cun acerto moi bo”, resumiu o adestrador de Lugo.
Como balance positivo, destaca o xogo defensivo, xa que “salvo quizáis cinco minutos no terceiro cuarto, respectamos a intensidade defensiva, a garra, que vimos nos 35 minutos restantes. Neste tipo de partido sempre hai que ser o máis positivos posible”.
Como parte negativa, fai autocrítica co xogo exterior. Na opinión do adestrador, “non aportamos nas exteriores todo o que tiñamos que aportar. Na primeira parte, só dous puntos foron das xogadoras exteriores e na segunda só cinco. Fáltanos consistencia nese apartado”.
En poucas palabras, este partido serviu, segundo o técnico do Ensino, para ver como o equipo segue crecendo en defensa e acumula boas sensacións “de cara aos seguintes partidos e de cara a unha segunda volta difícil”.
O seguinte reto será xa este martes, 22 de decembro, ante o Movistar Estudiantes, ás 19:15 no Pazo dos Deportes de Lugo.
FICHA TÉCNICA
80) PERFUMERÍAS AVENIDA: María Cazorla (6), Tiffany Hayes (13), Eva Hof (6), Katie Samuelson (7), Karlie Samuelson (12) -cinco inicial-. Tamén xogaron: Leonor del Pilar (11), Silvia Domínguez (3), Andrea Vilaró (5), Nikolina Milic (13), Umo Diallo (4) e Paula Suárez (-).
45) DURÁN MAQUINARIA ENSINO: Merrit Hempe (12), Isabel Van Del Adel (3), Aleksandra Stanacev (-). Vega Gimeno (16), Alba Prieto (-) -cinco inicial-. Tamén xogaron: Nina Bogicevic (2), Laura Aliaga (2), Chatrice White (10) e Marta Blanco (-).
PARCIAIS: 17-6, 22-16, 26-10 e 15-13.
ÁRBITROS: Eric Carrera Rosdelvall, Jesús Marcos Martínez Prada e Daniel Checa Nebot.
INCIDENCIAS: Partido correspondente á 16ª xornada de Liga Femenina Endesa, disputado no pavillón municipal Wurzburg de Salamanca.
