Unha boa defensa e a intensidade desde o minuto 1 foron as claves polas que o Durán Maquinaria Ensino logrou a súa novena vitoria da tempada, desta vez ante o SPAR Gran Canaria, non sen sufrir ata o último segundo.
Este trunfo serve para deixar atrás as malas sensacións da derrota colleitada ante un rival directo, o Lointek Gernika Bizkaia na xornada anterior, cun resultado final 66-78. As lucenses volven reforzadas das illas Canarias, con dous puntos máis baixo o brazo. “Estivemos ao nivel da situación e do partido”, resume a xogadora lucense, Alba Prieto.
Desta vez, as xogadoras do Ensino dirixidas por Carlos Cantero souberon saír enchufadas desde o primeiro minuto, reaccionando ante os ataques rivais e respondendo con forza ante un conxunto moi agresivo e físico.
Algo nada doado, xa que, segundo Prieto, “foi un partido moi complicado, puxeron o nivel moi alto. A nivel físico son un equipo moi forte e que pode subir a intensidade pero creo que fumos capaces de estar a esa altura e ao final estivemos acertadas”, reflexionou.
O Ensino respondeu desde a liña de 6,75 metros
Así, o partido comezou cun parcial 4-0 a favor das locais, que non tardou en responder Stanacev cun triple. A partir de entón, o cadro galego, guiado por Merritt Hempe e Vega Gimeno aumentou o nivel en ataque impoñéndose ao cadro canario. O Ensino levávase xa o primeiro cuarto, 18-22.
Para o segundo, a tónica do duelo mantívose, con ocasións para ambos bandos pero máis acerto do lado visitante, especialmente grazas a Laura Aliaga, que sumaba tantos de dous en dous. Gimeno, White e Prieto afirmaron a superioridade das galegas con tres triples consecutivos, obrigando a José Carlos Ramos a solicitar un tempo morto.
As indicacións do técnico canario traducíronse nun mellor xogo local, que logrou un parcial de nove puntos achegándose ás galegas, pero sen alcanzalas. Por parte visitante, entre as filas lucenses Vega Gimeno tivo que abandoar a pista por un golpe (34-42).
Dificultades na segunda parte
Tras o descanso, as canarias avanzaban a pasos axigantados, ameazando a vitoria das xogadoras de Cantero. Segundo o técnico, na segunda metade os criterios arbitrais “cambiaron totalmente”, permitindo ás locais facer zonas, golpes e faltas o que “lles permitiu correr e recuperar a vantaxe que tiñamos”.
Carlos Cantero: “Cambiaron totalmente a forma de arbitrar”
Un parcial 8-0 ao inicio obrigou ao adestrador galego a solicitar un tempo morto para facer reaccionar ao seu plantel. Minutos despois, unha canasta de Stanacev e un triple de Aliaga volveron enchufar ás visitantes ao partido, que non perdían a distancia lograda. Con todo, as locais amezaban coa remontada e, a dez minutos do final, estaban a só un tiro.
O último cuarto comezou cun triple de Gimeno que serviu para que o Ensino se alonxase das rivais e seguise medrando no marcador. Estes tres puntos formaron parte dun parcial 0-8 con outro triple da mesma xogadora e de Stanacev, deixando ás locais con poucas opcións para remontar.
Con todo, o Gran Canaria non baixaba os brazos e un triple de Taylor logrou poñer en guardia ás visitantes, que tiveron que esforzarse por manter a vitoria. A falta de dous minutos para o final, tanto apretaron as locais que lograron poñerse por diante por un punto, obringando a Cantero a solicitar unha pausa.
Unha acción de Hempe, seguida doutra de Stanacev facían que as galegas non perderan a esperanza. A sete segundos da bocina, co Gran Canaria ameazando con superar ás galegas, dous tiros de Stanacev afianzaron a vitoria lucense, que volve a casa coa novena vitoria lograda.
Alba Prieto: “A a base de axudarnos, estar pechadas e controlar o rebote conseguimos levarnos o partido”
“Ao final a base de axudarnos, estar pechadas e controlar o rebote conseguimos levarnos o partido nunha vitoria moi importante e nunha pista na que sabíamos que era moi complicado. Ao final sacamos o partido que é o importante e marchamos contentas”, declarou a 33 do Ensino.
Desta forma, o equipo de Lugo ocupa a sétima posición da táboa e pon xa a vista no seguinte duelo, atnte o Casademont Zaragoza, o próximo 15 de xaneiro.
FICHA TÉCNICA
80) SPAR GRAN CANARIA: María España (12), Sparkle Taylor (20), Sika Kone (8), Kai James (13) e Marta Hermida (14) —quinteto inicial—. Tamén xogaron: Djneba Ndiaye (13), Alina Hartmann (-) e Shokhna Fall (-).
83) DURÁN MAQUINARIA ENSINO: Merrit Hempe (14), Natalie Van den Adel (3), Aleksandra Stanacev (12), Vega Gimeno (20) e Alba Prieto (10) —quinteto inicial—. Tamén xogaron: Nina Bogicevic (4), Laura Aliaga (11) e Chatrice White (9).
PARCIAIS: 18-22, 16-20, 24-18, 22-23.
ÁRBITROS: Francisco José Araña, José Antonio Pagan e Eva Areste
INCIDENCIAS: Partido correspondente á 20ª xornada de Liga Femenina Endesa, disputado no polideportivo La Paterna en Las Palmas de Gran Canaria.
