O Dépor ABANCA visita ao Real Madrid Feminino da galega Tere Abelleira e a ex deportivista Misa, e non o fai no seu mellor momento. Todos os seus partidos os conta como derrotas nesta tempada. Pero aínda así o equipo busca reencontrarse co seu fútbol sobre o verde de Valdebebas. Alí terá lugar o cruce mañá mércores 4 de novembro a partir das 16:00 horas. Manu Sánchez avisa: “Este é un equipo que lle planta cara a todos os rivais. Non vai ser menos co Real Madrid“,
Na convocatoria está finalmente Carolina Arbeláez que era dúbida por lesión, queda por ver se está para saír de inicio. Quen seguen sen poder sumar neste desprazamento son Kenni, Cris e Peke, as dúas últimas son pezas importantes no esquema de defensa e ataque deportivista respectivamente. No caso de Ainize Barea, leva un tempo cun cadro vírico que lle impide adestrar co grupo. Explicaron no seu día desde o club doruñés que non ten nada que ver coa COVID-19.
Dúas ex do Dépor ABANCA estarán nas filas do rival. Por un lado a gardamallas Misa, e polo outro a centrocampista galega Tere Abelleira.
Será unha tarde extraña. “Enfrontarnos a Tere Abelleira será unha sensación especial e diferente para todos nós, no so para ela”, explica Manu Sánchez adestrador das branquiazuis.
Tal e como relata o técnico, “Tere foi unha parte importante do equipo e do grupo, témoslle un cariño enorme. É diferente vela con outro escudo, enfrontándose a nós”. Con todo, advirte que “a relación humana, a Tere Abelleira persoa, e máis que a de Teresa futbolista e aquí deixou unha pegada importante”.
“O noso maior enimigo somos nós mesmas”, di Manu Sánchez
O técnico do Dépor ABANCA non agacha que neste momento no que os resultados no chegan e o xogo das branquiazuis vai e ven, o principal atranco está de portas para adentro. Principalmente no estado anímico das futbolístas que empezan a vivir os partidos con ansiedade. Esta mesma semana explicaba en rolda de prensa que no plantel deportivista respírase “unha especie de ansiedade, de bloqueo mental, pero estou tranquilo, sei do que é capaz este equipo”.
Manu Sánchez, adestrador do Dépor ABANCA: “Temos que tratar de dar un paso adiante e, con tranquilidade e responsablidade, coller a confianza que nos está a faltar. Nótase en cada pase, en cada control”
Sánchez admitía que neste momento “para nós calquera rival é complicado por que o noso maior enimigo que temos somos nós mesmas”. Sinala que “hai que tratar de dar un paso adiante e, con tranquilidade e responsablidade, coller a confianza que nos está a faltar. Nótase en cada pase, en cada control…
Aínda así este é un equipo que lle planta cara a todos os rivais. Non vai ser menos co Real Madrid”, avisa.
“O Real Madrid é unha Selección”, di o adestrador deportivista
O técnico deportivista destada do rival como se ten reforzado este ano. Pouco que ver co Tacón da tempada 2019-20. O Real Madrid esta tempada, tal e como apunta Manu Sánchez, “é un equipo super reforzado. Acadou ás mellores xogadoras do país. Practicamente é unha Selección”.
Sobre as aspiracións das merengues para este curso 2020-21, na opinión do adestrador das coruñesas, “sendo un equipo co escudo do Real Madrid, ten que optar ao título de Liga”. Matiza o técnico que neste caso “o Barcelona está un bo paso por riba de todos nós”. Pero, así e todo, considera o preparador coruñés que o equipo madrileño “coas incorporacións que ten, o proxecto que ten, e o orzamento co que conta, ten que ser candidato, se non ao título, ao segundo posto”.
Manu Sánchez, adestrador do Dépor ABANCA: “O Real Madrid é un equipo super reforzado. Acadou ás mellores xogadoras do país”
Explica Manu Sánchez que o Real Madrid ten “moitos mecanismos similares de xogo con respecto ao ano pasado, pero con conta con mellores futbolistas, que son ao final as que marcan as diferencias”, argumenta.
Para o adestrador galego, o rival deste mércores “fixo moi boas incorporacións. Hai unha boa combinación de nacionais e estranxeiras”.
Os resultados do Real Madrid no que vai de Liga colócano no posto 13º da táboa clasificatoria na Primera Iberdrola. Logo de tres partidos xogados suman un triunfo (co Rayo Vallecano 3-1), un empate (co Valencia 1-1) e unha derrota (co FC Barcelona 0-4).
Manu Sánchez, adestrador do Dépor ABANCA: “Sendo un equipo co escudo do Real Madrid, ten que optar ao título de Liga, pero o Barcelona está un bo paso por riba de todos nós”
As madrileñas teñen pendente de disputarse o cruce contra o Levante UD da última xornada. Así que, por se tiñan poucas cousas ao seu favor na balanza, ademais chegan máis frescas a este cruce entre semana co que continúa a maratón de cinco partidos en quince días que vivirán as plantillas da máxima categoría do fútbol femino español.
Esta serie será unha proba de lume para testar o fondo físico dos distintos equipos. Seguramente o contar con varias xogadoras por posto e plantillas amplas, será tamén, neste momento un feito diferencial entre uns equipos e outros. O cansanzo pasará factura si ou si. O caso é quen terá reforzos de garantías dos que tirar no banquillo e quen terá que forzar a corda das titulares para arañar puntos nestas xornadas.
Tere Abelleira, na convocatoria do Real Madrid
Manu Sánchez convoca a 19 futbolistas para o desprazamento de mañá mércores 4 de novembro, no que as deportivistas se van enfrontar ao Real Madrid Feminino. A cita será en Valdebebas ás 16:00 horas e corresponde á 5ª xornada da Primera Iberdrola. O cruce poderá seguirse a través de Real Madrid TV.
Polo que respecta ao Real Madrid Feminino, David Aznar ten citado as seguintes 20 xogadoras para este encontro diante do RC Deportivo ABANCA:
- Porteiras: Misa e Yohana.
- Defensas: K. Robles, Peter, Samara, Ivana, M. Corredera, Claudia F. e Porto.
- Centrocampistas: Thaisa, Kaci e Teresa Abelleira.
- Dianteiras: Olga, Asllani, Jakobsson, M. Cardona, Lorena, Ubogagu, J. Martínez e Ari.
