O ENCE Marín Futsal supera os dezaseisavos de final da Copa da Raíña de Fútbol Sala Feminino a costa da eliminación do Viaxes Amarelle FSF. O partido rematou 3-3 e tivo que decidirse na lotaría dos penaltis onde a sorte e o acerto caeron do bando local.
Afrontaba este sábado, 19 de decembro, o equipo herculino o seu último partido do ano visitando a cancha do ENCE Marín Futsal en partido correspondente a dezaseisavos de Copa de S.M. A Raíña de Fútbol sala. As herculinas tiveron o balón e o peso do partido, pero as locais souberon xogar o seu valor á contra e conseguiron sacar un empate a tres tantos ao final da prórroga. Nos penaltis, as herculinas non tiveron a fortuna suficiente e cáense da competición do K.O.
COPA DE LA REINA
Todo listo para empezar en el Pabellón de A’Raña.@Grupo_Ence @marin_futsal
🆚@amarellefsf pic.twitter.com/z7jQwFUvCj— Marin Futsal (@marin_futsal) December 19, 2020
O partido empezou cun Viaxes Amarelle FSF que quería ter o balón en todo momento, e cunha presión moi alta sobre o seu rival, que puxo en moitas complicacións ao ENCE Marín Futsal. Desta maneira, cando apenas transcorreran dous minutos de xogo, Cris Lourés finalizaba unha xogada ao segundo pau e colocaba o 0-1 no marcador.
O partido seguía cun Viaxes Amarelle FSF, executando ataques constantes, e resaltando o valor dun conxunto local moi encerrado no último cuarto de pista, pero coa firme intención de sorprender á contra. Desta forma, conseguía ao cinco minutos de xogo pór a igualada no marcador, cun gol de Kun, finalizando no segundo pau, que devolvía a igualada ao luminoso (1-1).
Aínda quedaba moito partido por diante, e mentres as herculinas xogaban o balón con criterio e xeraban ocasións sobre a portaría local, o ENCE Marín Futsal optaba por tentar sorprender á contra ou xogar balóns longos ao pivot, xerando gran perigo en pés de Café. Os minutos pasaban, e o partido chegaba ao tempo de descanso, co marcador 1-1 no electrónico do pavillón municipal A Rega de Marín.
Na segunda metade o encontro seguiu unha dinámica similar á da primeira metade. Un Viaxes Amarelle FSF convencido en xogar e tocar o balón para xerar perigo, e unha defensa moi atrasada e unhas grandes actuacións da porteira local que non permitían transformar ningunha das ocasións e mantiña a meta do ENCE Marín FS a cuberto.
Na medianía do segundo período un saque de banda a favor das locais, terminaba cun disparo exterior de Kiko, que tocaba en Yaiza, desviando a traxectoria do balón, e coándose ao fondo da rede para pór o 2-1 no marcador.
Con este gol en contra, o Viaxes Amarelle FSF envorcouse un pouco máis en ataque, á vez que as locais se pechaban cada vez máis sobre a súa portaría. Os minutos pasaban, e o gol non chegaba; e a falta de pouco máis de 3 minutos, Jorge Basanta, técnico das herculinas, opta polo xogo de cinco para poder conseguir a igualada. Houbo ocasións de poder facela, pero o gol non chegou, ata que a falta de once segundos, e nun disparo exterior, Lau Doce puña o 2-2 no marcador, conseguindo forzar a prórroga.
A prórroga contou con goles pero non desfixo o empate
Chegaba o tempo de prórroga, e aínda que xa ían moitos minutos disputados, as herculinas aínda se vían con ganas, e ao primeiro minuto da prórroga, María Gómez adianta ao conxunto laranxa cun gol de penalti, tras man das locais.
O partido parecía que se puña de cara para o conxunto do Viaxes Amarelle FSF, pero as herculinas tiñan cinco faltas, e a escasos segundos do final da primeira metade da prórroga, chegaría un dobre penalti para as locais, o cal se encargaría de transformar no 3-3, Marta Gago.
Aínda quedaban tres minutos máis por diante, para poder conseguir o gol que permitise pasar de fase, sen chegar ao tempo de asueto; pero unha gran defensa e boa actuación da meta local, permitiron manter o 3-3 no marcador até o asubío final.
E coa prórroga concluída, chegaba o tempo da lotaría dos penaltis. Empezou ben para as herculinas xa que na primeira quenda Anna Escribano transformaba o penalti, mentres que Tami paraba o de Marta.
Na segunda quenda, igualábase a contenda cunha parada de Antía ao penalti de Yaiza e o gol de Kiko.
Na terceira quenda, Antía se eregía como protagonista e paraba o penalti a Lau Doce, mentres que Pau anotaba o do ENCE Marín Futsal.
A cuarta quenda finalizaba con goles de Candela e Kun para os seus respectivos equipos, e todo quedaba para a quinta e última quenda de penaltis. Foi aí cando onde María Gómez botaba o balón fóra, e o ENCE Marín Futsal conseguía o pase a oitavos de final de Copa de S.M. a Raíña de Fútbol sala.
Descanso navideño no Amarelle que xa pensa na Liga
Tras a disputa deste último encontro do ano 2020, o Viaxes Amarelle FSF terá a próxima semana como descanso, e non volverá aos adestramentos até o 28 de decembro.
Agora teñen tempo por diante, para preparar a segunda volta da primeira fase da competición de liga. Está marcado no calendario o primeiro partido da segunda volta, para o vindeiro sábado 16 de xaneiro de 2021 a partir das 18:00 horas, no Pavillón Municipal de Sagrada Familia da Coruña), recibindo ao Ourense Envialia FSF.
FICHA TÉCNICA
ENCE MARÍN FUTSAL: Antía, Café, Suki, Mar, Paula – quinteto inicial -. Tamén xogaron: Kun, Vera, María, Kiko, Inés e Marta Gago.
VIAXES AMARELLE FSF: Sandra Rodríguez, Cris Lourés, Yaiza, Anna Escribano, Candela Soria – quinteto inicial -. Tamén xogaron: María Gómez, Lau Doce, Sofía, Patri Corral e Tami Gándara.
GOLES: 0-1 Cris Lourés (min. 2); 1-1 Kun (min. 5); 2-1 Kiko (min. 32); 2-2 Lau Doce (min. 40); 2-3 María Gómez (penalti – min. 41); 3-3 Marta (doble penalti – min. 43). PENALTIS: 0-1 Anna Escribano; 1-1 Kiko; 2-1 Pau; 2-2 Candela; 3-2 Kun.
ÁRBITROS: Menéndez Nistal e Vilas López do Colexio de Árbitros da Mariña e Ourense. Mesa: Doval Rodríguez do Colexio de Árbitros de Ourense. Amonestaron con cartón amarelo a Kun do Ence Marín Futsal e a Lau Doce e Cris Lourés do Viaxes Amarelle FSF.
INCIDENCIAS: Partido correspondente a dieciseisavos de final da competición de Copa da SM a Raíña de fútbol sala disputado no pavillón Municipal de A Raña (Marín).
