Hai que ver a teima que teñen algunhas persoas das que mandan en dicirnos ás mulleres como temos que vestirnos. Que se máis tela, que se menos tela… Vaia tela! digo eu.
Que cansino todo, pufff!
O tema ao fío de que a Federación Internacional de Balonmán (IFH) vén de informar de que mudou a súa normativa ao respecto da vestimenta das xogadoras de balonmán praia. As deportistas que elixamos esa modalidade xa non estamos obrigadas a xogar en bikini.
A norma indicaba que “as mulleres deben usar bikini onde a parte superior debe ser un sostén deportivo axustado con aberturas nos brazos. A parte inferior non debe ter máis de 10 cm nos lados”.
Logo do cambio a norma queda así: “o uniforme do equipo feminino consiste nunha camiseta sen mangas axustada ao corpo, pantalóns curtos axustados e accesorios permitidos”. E dicir, que iremos en bikini se queremos, pero o de ir axustadas, non nolo quitan.
Este cambio xurde grazas á negativa das xogadoras do equipo de Noruega na Eurocopa deste ano que se celebraba en Bulgaria. As deportistas dixeron que consideraban que obligalas a xogar con bikinis era sexista ademais de incómodo. A consecuencia a curto prazo, aplicando a norma foi unha multa pecuniaria. A medio prazo a consecuencia foi moito máis interesante: mudouse a norma. Varios foron os países que apoiaron as deportistas. Dinamarca, Finlandia, Suecia, Islandia e por suposto Noruega estaban entre deles.
