O regreso da Liga Guerreras Iberdrola no foi segundo o esperado para o Atlético Guardés. Unha derrota ante o Bera Bera, actual líder do grupo A que ademais marcha invicto, podía encaixar na lóxica guardesa, pero o partido (22-31, 7-15 ao descanso) foi un cúmulo de circunstancias que fixeron máis madeixa do previsto nas locais.
Unha pobre efectividade anotadora e unha defensa pouco consistente deron ás a un equipo que, a pesar de presentar catro baixas destacadas (Boada, Cesáreo, O’Mullony e Gil de la Vega), dedicouse a correr, sentenciar con saques rápidos e afogar as da Guarda en seis metros.
Os primeiros minutos do partido, tolos, tras dous meses sen competición oficial presentaban un choque incerto. Tanto locais como visitantes non atinaban nas súas primeiras accións e até o minuto tres non se abriu o marcador por medio de Laura Hernández (0-1).
O Atlético Guardés apostaba por mover o balón, traballar a continuidade e esperar opcións claras de gol. Pero aos poucos as de Prades foron converténdose en vítimas dos seus propios erros con máis dunha decena de lanzamentos fallados na primeira parte.
Este rexistro unido a unha defensa que tardou en asentarse, como é lóxico tras dous meses sen esixencia competitiva, levou ao Bera Bera a correr, correr e volver correr. A súa especialidade.
Do 4-5 o marcador pasou ao 4-9 e para evitar sustos maiores o técnico local, José Ignacio Prades, pediu o primeiro tempo morto do partido. Estancadas no catro tantos, facían falta revulsivos: Gómez, Santiago e Rajnohová foron entrando en pista -o sete inicial estivo formado por Lima, Arcos, Buforn, Moreno, Pérez, Valero e Marisol Carratú usando a Estefanía Descalzo para a defensa-.
Ao descanso o Super Amara Bera Bera vencía por 7-15
A pesar dos cambios e mesmo dun novo tempo morto local, as de Imanol Álvarez seguían ao seu e a renda ao descanso xa era de 8 tantos (7-15). O mellor da primeira parte foi a boa noticia de que Sarah Valero e Rosario Urban volvesen a contar con minutos esta tempada.
O segundo acto comezou con Buforn forzando uns 7 metros e a exclusión de Manuela Pizzo (8-15), pero Esther Arrojería, que asinou un sensacional partido con 8 goles, anotaba sen problemas. Foron minutos bos para o Atlético Guardés, con Paulina Buforn cambiando o ritmo e dando outro aire ao equipo. Mellor cara. Tamén entrou Miriam Sempere para dar substitución a Marisol Carratú baixo paus e deixar boas accións.
O mesmo resultado que no partido de ida
Pero pouco había que facer, un parcial de 3-0 levou a Álvarez a parar o partido pero nunca se viu perigar a vitoria donostiarra. A renda visitante, que chegou a ser de catorce goles (13-27), deu comodidade ao Bera Bera e Erika Rajnohová aproveitou para deixar algunhas propostas interesantes.
Ao final, 22-31, un resultado idéntico ao partido de ida que deixa ao Atlético Guardés afastado do liderado pero pelexando por manter o seu terceiro posto no grupo A de cara á seguinte fase de pelexa polo título.
FICHA TÉCNICA
22) CLUB BALONMÁN ATLÉTICO GUARDÉS (7+15): África Sempere, Sandra Santiago (2), Lorena Pérez (2), Estefanía Descalzo (1), Miriam Sempere, Paulina Pérez (5), Patrícia Lima, Cristina Barbosa, Rosario Urban (2), Paula Arcos (4), Sarah Valero (1), Carla Gómez, Marisol Carratú, Erika Rajnohová (5), Laura Morais e Daniela Moreno.
31) SUPER BERA BERA (15+16): Alice Fernandes, Esther Arrojería (8), Mariane Oliveira (3), Manuela Pizzo, Nekane Terés (3), Alba Menéndez (1), Laura Hernández (3), Malena Cavo (6), Maitane Echeverria (2), Adriana Cardoso (2), Ainhoa Etxeberria (3), Mirene Moreno e Renata Lais.
RESULTADO CADA CINCO MINUTOS: 1-1,4-6, 4-10, 4-11, 5-12, 7-15 (descanso), 10-19, 10-21, 12-22, 13-27, 17-30, 22-31 (final).
ÁRBITROS: José C. Friera Cavada e Jesús Álvarez Menéndez (do colexio asturiano). Excluíron por parte das locais as xogadoras Lorena Pérez e a Laura Morais, e no plantel visitante excluíron as xogadoras Alba Menéndez e Manuela Pizzo.
INCIDENCIAS: Partido correspondente á novena xornada da Liga Guerreras Iberdrola disputado no pavillón da Sangriña de A Guarda a porta pechada por mor da situación sanitaria que se vive en Galicia ao fío da pandemia de COVID-19.
