- O CRAT Residencia Rialta consegue sumar como visitante por primeira vez e arrinca un valiosísimo empate en casa do CR Sant Cugat.
Cos datos previos, ninguén apostaba polas coruñesas. Ninguén excepto aqueles que as visen adestrar, aquelas persoas que coñezan o potencial rugbístico e o corazón indomable destas xogadoras. Todo eran adversidades nas últimas datas. Aumentaba a lista de baixas, a última a de Quen Makkinga, a anotadora máis prolífica, que viaxou pero non puido xogar. Parecía que a lista de catro derrotas ía alongarse en Cataluña.
Pero o CRAT Residencia Rialta demostrou que é capaz de plantarlle cara a un equipo que sumaba cinco triunfos consecutivos ata o punto que non se amedrentou co parcial de 10-0 ao comezo do encontro. Repartición de puntos e alegría para as coruñesas que despiden o ano con bo sabor de boca.
As ausencias non eran poucas no CRAT Residencia Rialta e houbo novidades no XV inicial. A máis destacada, a presenza de Leire Gorrotxategi actuando de medio melé. Alevín, finalmente, si puido formar e exerceu de defensora. Elsa e Ceci eran a parella de centros no último partido da capitá esta tempada. Con esas alternativas o conxunto coruñés buscaba vencer en Barcelona e recortar distancias co seu rival desta xornada.
O CR Sant Cugat comezou o encontro levando a iniciativa. No minuto 4 Abril Camacho abría o marcador cun pousado e, no 8, era Alysha Stone a que anotaba o segundo ensaio local.
Dez minutos e dez puntos en contra. Se xa era un partido complicadísimo a priori, o comezo para o CRAT Residencia Rialta non facilitaba o panorama. A pausa de hidratación aos 15 minutos víñalle mellor ás herculinas para cambiar a dinámica.
O CRAT Residencia Rialta quería tomar un pouco máis de protagonismo no duelo igualando a posesión. Jos e Pakito realizaban os primeiros cambios, entraban no encontro Anita e Alba Lalín. Un roubo espectacular de Judith e o seu posterior galopada culminouna a tinerfeña cun ensaio para o CRAT Residencia Rialta . Alejandra transformou e as galegas poñíanse a tres puntos das locais e o choque tomaba outra cor. As coruñesas íanse ao descanso con boas sensacións.
Unha conexión fantástica de Ceci e Judith permitíalle á canaria, de novo, pousar para darlle a volta ao marcador nada máis comezar o segundo tempo. O CRAT Residencia Rialta subira unha marcha máis, cunha ofensiva dinámica que encerraba a Sant Cugat no seu campo. Cando mellor estaba a xogar o equipo galego, chegou o ensaio rival nun avance pola banda sorprendente. Tocaba volver remontar.
Anita empataba ao transformar un golpe de castigo. Pouco máis de vinte minutos por diante pero o encontro estaba igualado, algo difícil de prever tras o 10-0 inicial. Sant Cugat volveu correr pola banda e, outra vez, Alysha Stone pousaba para adiantar ás catalás.
Pero o CRAT Residencia Rialta non lle perdeu o pulso ao partido. Un ataque moi traballado morreu cando case tiña ensaio o equipo coruñés, que viviu varios minutos dentro do vinte e dous local. O traballo da dianteira foi espectacular, pero non obtivo o resultado desexado.
O reloxo volvía xogar en contra das galegas. Consígnaa era clara: prohibido renderse. Impresionante o traballo das galegas para conseguir un ensaio que igualaba o marcador. Chegou o pousado por medio de Nicky, mágoa que non tivo o premio extra da transformación. Non se moveu máis o marcador. Dous puntos para cada contendente tras un partido de poder a poder que o espectador neutral haberá agradecido excesivamente.
O CRAT remata o 2022 en sexta posición
Importantísimo empate para o CRAT Residencia Rialta que deixa o 2022 vivo na loita polos postos que dan acceso ás semifinais. O 15 de xaneiro, as galegas recibirán en Elviña ao Crealia El Salvador co desexo de seguir sumando na casa.
FICHA TÉCNICA
20) CR SANT CUGAT: Meritxell Tur (min. 41 entra María Soriano), Maitane Ibáñez (min. 55 entra Carla Moraleda), Paula Nieto (min. 41 entra Paula Pou); Laura Rey, Montse Leuga; Sara Marín, Carmen Menacho (min. 48 entra Bea González), Carla Arca; Lucía Moya (min. 50 entra Rita Hinojosa), Esther Moraleda (min. 47 entra Elisabet Segarra); Abril Camacho, Laia Azorín, Alysha Stone, Ana Harris e Carla Rodríguez.
20) CRAT RESIDENCIA RIALTA: Nicky, Ali, Maica; Kyra, Pimi; Judith, Maitane, Maria Morant; Leire Gorrotxategi (min. 21 entra Alba Lalín), Alejandra (min 41 entra Valle); Tania, Elsa, Ceci, Selene (min. 10 entra Anita) e Alevín.
ANOTACIÓNS:
- 5-0 min. 4: ensaio de Abril Camacho.
- 10-0 min. 8: ensaio de Alysha Stone.
- 10-7 min. 24: ensaio de Judith e transformación de Alejandra.
- 10-12 min. 41: ensaio de Judith.
- 15-12 min. 50: ensaio de Ana Harris.
- 15-15 min. 56: golpe de castigo transformado por Anita.
- 20-15 min. 59: ensaio de Alysha Stone.
- 20-20 min. 76: ensaio de Nicky Dix.
EQUIPO ARBITRAL: Iñaki Muñoz. Sen expulsións.
INCIDENCIAS: Partido disputado no Estadio ZEM La Ginardera (Sant Cugat do Vallès, Barcelona) correspondente á xx xornada da Liga Ibedrola de rugby. Consulta a acta do partido.
