O Conservas Orbe Rubensa BM Porriño colleitou nesta sétima xornada da Liga Guerreras Iberdrola un empate a 29 goles ante un dos novos conxuntos da categoría, o Handbol Sant Quirze. Se antes do partido as galegas aspiraban ao triunfo, tras o choque, case pode darse por boas as táboas. O gol que puxo o definitivo empate no electrónico asinouno desde os sete metros Haridian Rodríguez.
As rivais das galegas non unicamente tiña colleitado dous puntos ata chegar ao Porriño. Foi ante o Balonmano Salud Tenerife. As xogadoras catalás viñan de perder co Caja Rural Aula Valladolid (26-29) e estaban ubicadas na 13ª posición da táboa clasificatoria. Tras esta xornada suben un posto e alcanzan a 12ª praza.
Pola súa parte, o Conservas Orbe Rubensa BM Porriño finaliza a xornada na décima posición (baixa da 9ª) froito de tres derrotas, dous empates e unha vitoria que lles fai posuidoras de 4 puntos. Logo da derrota ante o Rocasa Gran Canaria (27-22), as de Ismael Martínez precisaban un triunfo pero non chegou.
As visitantes tomaron o control do marcado desde os primeiros compases do partido. Foron por diante ata o descanso ao que se chegaría cun 15-18 que daba conta de que o Conservas Orbe Rubensa BM Porriño non o había ter doado para rañar puntos nesta xornada. Pouco incisivo en ataque e con fendas en defensa, o bloque que adestra Ismael Martínez non estaba a amosar a súa mellor facina en cancha propia.
A exclusión de Ekaterina Tyaglyay en primeiro lugar, e de Clara Moliner xusto despois, supuxo unha vantaxe para ás galegas que estas souberon aproveitaron. Foi aí cando conseguiron igualar o partido colocándose o marcador luminos da cancha galega cun 20-20. O BM Porriño perseverou na súa reacción e colocouse por diante das catalás poñendo o partido cun 24-22 no minuto 45 de xogo.
Volveu a pisar o acelerador o Handbol Sant Quirze e a empatar o choque. De aí ao final puido pasar de todo. Estivo por arriba o Porriño e tamén o Handbol Sant Quirze. O gol definitvo foi de Haridian.
Último intento do Porriño sobre a bucina
Co electrónico sinalando o 29-29 e con apenas dous segundos para que soase a bucina, o Conservas Orbe Rubensa BM Porriño intentou acadar un último gol que lle outorgase a vitoria. Foi cun pase longo da porteira Estela Carrera que chegou ata o borde da área, pero que a súa compañeira non puido chegar a rematar polo bloqueo das visitantes.
A vindeira xornada da Liga Guerreras, a oitava, o Conservas Orbe Rubensa BM Porriño visita ao Costa del Sol Málaga. Será o sábado 6 de novembro ás 18:00 horas no Pavillón Deportivo Rubén Ruzafa en Torre de Benagalbón (Málaga).
FICHA TÉCNICA
29) CONSERVAS ORBE RUBENSA BM PORRIÑO: Estela Carrera (p), Carolina Bono (2), Micaela Joana Casasola (1), Alicia Campo (1), Marta da Silva (1), Erica Isabel Correia (5), Aitana Santomé (1), Maider Barros (7), Sarai Samartin (2), Haridian Rodríguez (6), Thais Fermo (4) e Fátima Ayelen Rosalez (p. s.)
29) HANDBOL SANT QUIRZE: Helena de Sousa (p), Carla Robles (2), Galâ-La Carreras (2), Ona Vila (4), Ane Crespo (1), Paula Plana (1), Remei Prat (2), Clara Moliner (-), Ekaterina Tyaglayay (2), Marina Rodríguez (1), Nerea Gil (6), Judith Sans (4), Julia Nuez (3), Olga Moliner (-).
PARCIAIS CADA CINCO MINUTOS: 1-3, 4-7, 7-10, 9-12, 12-14 e 15-18 – descanso – 21-22, 24-22, 25-25, 26-27 e 29-29
ÁRBITROS: Abel Juncal López e Ángel Mateos Alonso. Mesa: Laura Costas Rial e Francisco Javier Álvarez Centeno. Excluíron polas xogadoras locais unicamente a Aitana Santomé, mentres que na escuadra visitante foron excluídas as deportistas Carla Moliner, Ekaterina Tyaglyay e Julia Nuez.
INCIDENCIAS: Partido correspondente á sétima xornada da Liga Guerreras Iberdrola 2021-22 disputado no Pavillón Municipal do Porriño con público.
