A directiva do RC Deportivo, encabezado por Fernando Vidal como presidente, vén de facer pública a súa marcha esta mesma tarde. Pouco despois, o club anunciaba que Antonio Couceiro liderará o novo Consello de Administración no que haberá, por primeira vez na historia da entidade, unha muller. Trátase da empresaria do sector audiovisual Emma Lustres. Na breve reseña biográfica que de Emma Lustres publicaba o club herculino na súa web poñíase en valor que a empresaria do audivisual “xogará un papel relevante no mercado dos dereitos de televisión”.
O deportivismo vive novamente un momento difícil e decisivo na súa historia e a situación deportiva do primeiro equipo masculino deu lugar a un novo cambio no timón da entidade.
Desde que pola la mañá se anunciaba unha rolda de prensa do presidente, Fernando Vidal, contra ás 18:00 horas de hoxe luns 8 de febreiro, na Coruña barruntábase a posibilidade dun cambio no sillón da presidencia deportivista. Algo que finalmente rematou por aconteder no mesmo día.
Posta a disposición dos cargos de Vidal e o seu Consello
Así, a primeira noticia da tarde producíase nesa comparecencia ante os medios de comunicación de xeito telemático do presidente saínte, Fernando Vidal, xunto cos conselleiros: Antonio Armenteros, Ricardo González, Federico García, Manuel Vázquez, José Luis Queijeiro e Argimiro Vázquez, este último tivo que facelo desde Madrid por unha cuestión de saúde, xa que segundo explicaba Vidal, está infectado por COVID-19 e atópase en proceso de recuperación da citada doenza.
Os sete membros do consello puxeron a disposición do accionista maioritario do Real Club Deportivo da Coruña os cargos que ostentaban desde o pasado 14 de xaneiro de 2020, é dicir, hai pouco máis dun ano.
Nesa comparecencia, o presidente saínte, Fernando Vidal, analizou as circunstancias que lles levaron a tomar esa decisión e se amosou, no seu nome e no do resto do Consello de Administración do Real Club Deportivo da Coruña, disposto a propiciar unha transición tranquila e ordenada, tendendo así a man a quen os substituíse.
Poco tempo despois, saltou a segunda nova: ese Consello de Administración saínte, xa tiña reposto.
Antonio Couceiro, novo presidente do RC Deportivo
O propio RC Deportivo anunciaba a través da súa web e redes sociais que se nomeaba un novo Consello de Administración “tras a renuncia presentada polo anterior”. Nese comunicado se trasladaba ao deportivismo que á fronte do novo Consello estaría “Antonio Couceiro, presidente da Cámara de Comercio da Coruña, de AFIGAL e CESGAR”, e que o resto de conselleiros van ser: Eduardo Blanco, Carlos Cantó, David Villasuso e Emma Lustres.
Á marxe de que o cambio na presidencia e no consello de administración supón unha nova importante para o club galego, a incorporación de Emma Lustres a núcleo directivo constitúe un hito na historia do deportivismo. Nunca antes unha muller tiña estado no Consello de Administración da entidade branquiazul.
Nos tempos nos que Augusto César Lendoiro era presidente, Berta Vales (xerente) era unha das persoas máis importantes no organigrama do club. E con Tino Fernández no cargo, chegou á directiva deportivista Gelines Romero para encargarse da Dirección Social. Pero o Consello de Administración fora, até este momento, un reduto no que as mulleres nunca tiveran espazo.
Coa chegada de Enma Lustres, tras cento quince anos de vida e case medio cento de presidentes, o RC Deportivo contará cunha muller no órgano de decisión máis importante da entidade. Túmbase así outro teito de cristal.
Os perfis do novo Consello de Administración no que está Emma Lustres
Segundo explica o Real Club Deportivo no seu comunicado, “con esta medida, o club incorpora ao seu Consello perfiles profesionais moi enfocados na xestión deportiva e empresarial, cunha traxectoria moi destacada nos ámbitos público e privado”.
Esta é a descripción do perfil biográfico do novo equipo directivo que a entidade deportivista fixo público esta tarde a través da súa web:
Antonio Couceiro
Antonio Couceiro Vázquez (A Coruña, 1955). É enxeñeiro de Camiños. Conta cunha ampla experiencia en xestión pública e privada. Actualmente, é presidente da Cámara de Comercio da Coruña, de AFIGAL e CESGAR. Anteriormente, presidiu a Autoridade Portuaria da Coruña, foi director xeneral de Begano e Conselleiro de Industria e Comercio da Xunta de Galicia.
Eduardo Blanco
Eduardo Blanco Pereira (A Coruña, 1955). Licenciado en INEF, doutor en Dereito e máster en Dereito deportivo. É presidente da Federación de Asociacións de Xestión do Deporte de España (FAGDE) e preside a Asociación Galega de Xestión Deportiva (AGAXEDE). É docente en varias universidades e coautor de varios libros de Xestión e dereito do deporte. Conta desde 2006, coa Medalla ao Mérito Deportivo concedida polo goberno de España e coa insignia de ouro da Federación de Asociacións de Xestores do Deporte de España (FAGDE).
Carlos Cantó
Carlos Cantó (Navés, 1976). Licenciado en Administración de Empresas e MBA por ESADE Business School e experto no mundo da mercadotecnia e dos patrocinios. É o CEO de SPSG Consulting Vocal e coordinador do capítulo ‘Mercadotecnia Deportiva’ da Asociación de Mercadotecnia de España, ademais de membro do Advisory Board do ‘World Football Summit’ (WFS). Carlos é profesor asociado en ‘Sports Business’ en ESADE Business School, Colaborador en diferentes medios (Expansión, Palco 23, Forbes edición España-, etc.) e profesor convidado en diversas escolas de negocio (IESE, Columbia University, IE, EAE, etc.) Liderou proxectos deportivos e de lecer en 25 países e participa en eventos e informes relacionados coa industria do deporte.
Emma Lustres
Emma Lustres (O Grove, 1975). É a fundadora de VACA Films Studio e puxo en marcha VACA TV e VACA NET TV. Vaca Films estableceuse nestes anos como unha das produtoras independentes líderes en España, desenvolvendo desde hai anos películas e series de éxito. Ten un gran coñecemento das grandes produtoras nacionais e internacionais que xogarán un papel relevante no mercado dos dereitos de televisión.
David Villasuso
David Villasuso Castaño (A Coruña, 1973). Actual conselleiro e director xeral do Real Club Deportivo. Chegou procedente de ABANCA. Licenciado en Empresariais pola Universidade da Coruña, Villasuso desenvolveu practicamente toda a súa carreira no sector bancario, pois entre 2003 e 2020 pasou por Deutsche Bank, Banco Etcheverría entre outros.
