O 2021 comeza forte para as loitadoras do CV Arenal Emevé. Este xoves, ás 12:00 horas recuperan o encontro adiado co Sanaya Libbys La Laguna e. aproveitando a viaxe ás Illas Canarias, o venres ás 18:00 horas disputan o partido contra o IBSA CV CCO 7 Palmas.
Todo un reto para as xogadoras de José Valle, que non saen da parte baixa da táboa da Liga Ibedrola de Voleibol da RFEVB. As lucenses ocupan a antepenúltima posición, ao acumular 7 puntos, con oito derrotas de cero puntos.
Pola contra, os dous equipos canarios son dos máis fortes da competición. O La Laguna está na terceira posición e, un posto por riba, están as súas veciñas do Las Palmas.
Estes duelos serán difíciles de superar xa que, ademais do alto nivel das rivais, varias xogadoras galegas non se desprazaron por estar de exames.
O primeiro deles, ante o La Laguna, é o partido aprazado do inicio da segunda volta, que non puido ser disputado por casos positivos no club canario. Agora, as lucenses teñen unha oportunidade de rascar puntos a un rival de altura, o que lles permitiría avanzar cara o obxectivo da permanencia.
Para o partido do venres, o escenario non é moito máis favorable. O Emevé competirá co actual campión da Copa Princesa, que logrou tras vencer ao VP Madrid cun 3-0. A MVP do torneo tamén está nas filas do Las Palmas: Noemi Santos. Outra xogadora que porá en perigo ás galegas, é a colocadora Patricia Aranda, unha das mellores da categoría.
Ao seu favor, sobre a pintura estarán loitadoras como Lucía Prol, a máxima anotadora do club e mellor sacadora, Carla Jiménez, a mellor bloqueadora, Inma Lavado, a mellor atacante e Cassandra Leann Bujan, a mellor receptora.
